آنجہانی بھارتی گلوکار کرشنا کمار کناتھ المعروف کے کے کی پوسٹ مارٹم رپورٹ سامنے آگئی ہے۔

پولس ذرائع نے بتایا ہے کہ گلوکار کے کے کی پوسٹ مارٹم رپورٹس کو ہسٹوپیتھولوجیکل ٹیسٹ کے لیے بھیجا جا رہا ہے جبکہ پوسٹ مارٹم کے معائنے سے معلوم ہوا ہے کہ ان کے دل کے گرد چربی کی تہہ تھی جو سفید ہوگئی تھی اور جب دل کھولا گیا تو والوز سخت ہوگئے تھے۔

ڈاکٹروں کے مطابق دل میں سختی وقت کے ساتھ ساتھ پیدا ہوتی ہے، اس لیے پوسٹ مارٹم رپورٹس کو ہسٹوپیتھولوجیکل ٹیسٹ کے لیے بھیجا جائے گا۔

پولیس نے کہا ہے کہ گلوکار کے جسم سے 10 مختلف دوائیں، وٹامن سی، اینٹی ایسڈز اور سیرپس کے ساتھ ملی ہیں جو تیزابیت، سینے کی جلن اور گیس میں فوری آرام فراہم کرتی ہیں جبکہ ان میں کچھ ہومیوپیتھک ادویات بھی شامل ہیں۔

پولیس ذرائع نے بتایا کہ گلوکار اکثر اینٹی ایسڈ گولیاں کھاتے تھے، 31 مئی کی صبح، اُنہوں نے اپنے مینیجر کو بتایا تھا کہ ان کی توانائی کم ہے جبکہ اس رات بھی موت سے چند گھنٹے قبل گلوکار نے اپنی بیوی کو بتایا تھا کہ اُن کے کندھے اور بازوؤں میں درد ہو رہا ہے۔

بھارتی میڈیا کے مطابق گلوکار 31 مئی کو کولکتہ میں ایک شو سے واپسی کے بعد نیو مارکیٹ تھانے کے علاقے کے تحت واقع گرینڈ ہوٹل میں گر گئے تھے اور اُنہیں شہر کے ایک نجی اسپتال لے جایا گیا تھا، جہاں انہیں مردہ قرار دیا گیا۔

واضح رہے کہ کے کے کی پہلی البم ’پل‘ 1999 میں ریلیز ہوئی تھی، تاہم اس کے بعد انہوں نے بالی ووڈ میں گانوں پر توجہ دی۔

انہوں نے بلاک بسٹر فلم ’ہم دل دے چکے صنم‘ کا مشہورِ زمانہ گیت ’تڑپ تڑپ کے‘، فلم ’دس‘ کا گیت ’دس بہانے‘، فلم ’غنڈے‘ کا گانا ’تو نے ماری انٹریاں‘ اور فلم ’وہ لمحے‘ کا مشہور گیت ’کیا مجھے پیار ہے‘ بھی گایا ہے، جبکہ فلموں میں ان کے گانوں کی ایک طویل فہرست موجود ہے۔