معروف گلوکار سدھو موسے والا کے قتل کیس میں پولیس نے پہلا ملزم گرفتار کرلیا ۔

بھارتی میڈیا کے مطابق گرفتار ملزم پریت سنگھ ایک بدنام زمانہ منشیات فروش ہے جسے پانچ دن کے لیے پولیس کسٹڈی میں دیا گیا ہے اور تفتیش کے لیے متعلقہ حکام کے حوالے کردیا گیا ، پریت ان 6 مشبہ ملزمان میں شامل تھا جنہیں گزشتہ روز حراست میں لیا گیا تھا۔

بھارتی میڈیا کے مطابق واقعے کے ایک دن بعد ریاستی پولیس اور اسپیشل ٹاسک فورس کی مدد سے اتراکھنڈ کے دیرہ دون سے قتل کے شبہے میں کل 6 افراد کو گرفتار کیا گیا جس میں سے ایک ملزم پر شبہ کیا جارہا ہے کہ اس کا تعلق لارنس بشنوئی گینگ سے ہے اور وہ سدھو موسے والا کے قتل میں ملوث ہے۔

یاد رہے کہ سدھو موسے والا کو اتوار کی شام گولیاں مار کر قتل کردیا گیا جب وہ بھارتی پنجاب سے اپنے لیے سیکیورٹی واپس لینے کی درخواست دینے جا رہے تھے جبکہ ان کے قتل سے ایک دن قبل ہی بھارتی ریاست پنجاب کی حکومت نے سدھو موسے والا سمیت 424 افراد کی سیکیورٹی واپس لی تھی۔

بھارتی میڈیا رپورٹس کے مطابق سنگھ سدھو موسے والا کا قاتل کینیڈا کا گینگسٹر ہے۔

پنجاب پولیس کا کہنا ہے کہ سدھو موسے والا پر حملہ گینگ وار کا شاخسانہ لگتا ہے۔

پولیس کے مطابق کینیڈا کا لارنس بشنوئی گینگ اس قتل میں ملوث ہے، گینگ کے رکن لکی نے کینیڈا سے اس حملے کی ذمہ داری قبول کی ہے۔

دوسری جانب سدھو موسےوالا کے والد نے انکشاف کیا ہے کہ گلوکار کو کچھ عرصے سے نامعلوم افراد کی جانب سے تاوان کی کالیں آ رہی تھیں۔

والد نے کہا کہ اتوار کو میرا بیٹا اپنے دوستوں گروندر سنگھ اور گرپریت سنگھ کے ساتھ کار میں روانہ ہوا تھا، اس وقت شبھ دیپ بلٹ پروف فارچونر اور دو گارڈز کو اپنے ساتھ لینے کے بجائے گھر سے نہتا نکلا تھا۔