اپنے سابق شوہر اور ہالی ووڈ کے عالمی شہرت یافتہ ہیرو جانی ڈیپ کے خلاف ہتک عزت کا مقدمہ ہارنے والی اداکارہ امبر ہرڈ کو ایک اور دھچکا لگ گیا۔

انڈیا ٹوڈے کے مطابق اداکارہ کی طرف سے عدالت میں دائر کی گئی درخواست میں موقف اپنایا گیا تھا کہ کیس کی سماعت کے دوران جیوری میں ایک ایسے رکن کو بھی شامل کیا گیا تھا جو اس مقدمے کا حصہ نہیں تھا، لہٰذا اس جیوری کے فیصلے کو کالعدم قرار دیتے ہوئے دوبارہ ٹرائل شروع کیا جائے۔

امریکی ریاست ورجینیا کے جج پینی ایزکاریٹ نے اداکارہ امبرہرڈ کے اس موقف کو غلط قرار دیتے ہوئے ان کی درخوست کو مسترد کر دیا ہے۔

امبرہرڈ کے وکلاء نے ورجینیا کی عدالت میں کہا کہ وہ جانی ڈیپ کو 1کروڑ ڈالر دینے کے جیوری کے فیصلے کو ایک طرف رکھ دیں اور مقدمے کی دوبارہ سماعت کا اعلان کریں۔

اس پر جج نے کہا کہ دھوکہ دہی یا کسی غلط کام کا کوئی ثبوت نہیں ہے، سابق جیوری نے تمام قانونی تقاضے پورے کیے ہیں، لہٰذا اس کے فیصلے کو کالعدم قرار نہیں دیا جا سکتا اور نہ ہی دوبارہ سماعت ہو سکتی ہے۔

یاد رہے کہ جانی ڈیپ اور امبرہرڈ نے ورجینیا کی عدالت میں ایک دوسرے کے خلاف ہتک عزت کے مقدمات درج کروا رکھے تھے جن کا فیصلہ امبرہرڈ کے خلاف آیا اور عدالت نے اداکارہ کو حکم دیا کہ وہ ہرجانے کے طور پر اپنے شوہر کو ڈیڑھ کروڑ ڈالر کی رقم ادا کریں۔

دوسری جانب جانی ڈیپ کو اپنی سابق اہلیہ کو صرف 20 لاکھ ڈالر ادا کرنے کا حکم دیا گیا تھا۔