اداکارہ ملیکہ شیراوت نے بالی ووڈ  کی حقیقت بتا دی۔

غیر ملکی خبررساں ادارے کے مطابق ملیکہ شیراوت جنہوں نے 2004ء میں فلم مرڈر سے فلمی سفر کا آغاز کیا تھا، انہوں نے 18 سال بعد اپنے جذبات کا اظہار کر دیا۔

انہوں نے اس دوران اپنی فلم مرڈر اور دیپیکا پڈوکون کی گہرائیاں کا موازنہ کیا۔

ساتھ ہی اداکارہ نے فلم انڈسٹری میں بدلتے رجحانات پر کھل کر اظہار خیال کیا۔

اداکارہ نے بتایا کہ فلم گہرائیاں میں دیپیکا پڈوکون نے جو کچھ کیا وہ میں 18 سال پہلے کرچکی ہوں، لیکن میری اداکاری کی کبھی بھی تعریف نہیں کی گئی۔

ملیکہ شیراوت نے مزید کہا کہ فلم انڈسٹری میں لوگوں کی توجہ ہمیشہ میرے جسم اور گلیمر پر رہی، کبھی کسی نے میری اداکاری کی تعریف نہیں کی۔

اداکارہ نے فلم انڈسٹری میں رونما تبدیلیوں سے متعلق سوال پر جواب دیا کہ ماضی میں عورت ستی ساوتری تھی یا پھر بدکردار، اسی تناظر میں فلم میں اس کا رول لکھا جاتا تھا۔

ملائکہ نے مزید کہا کہ اب فلم میں عورت صرف انسان ہے، جو خوش ہے یا غمگین ، غلطیاں کرتی یا لڑکھڑاتی ہے لیکن اس کے باوجود لوگ اسے پیار کرتے ہیں۔

ملیکہ شیراوت نے یہ بھی کہا کہ ہیروئنیں اپنے جسم سے متعلق بہت پراعتماد ہیں، جب میں نے مرڈر فلم کی تو بہت شور مچا ، لوگوں نے فلم میں بوسوں اور چھوٹے کپڑوں پر خوب باتیں بنائیں۔

اداکارہ نے کہا کہ میں نے پیار کے سائیڈ افیکٹ اور ویلکم جیسی فلمیں بھی کیں لیکن کسی نے میری اداکاری کو نہیں سراہا۔

انہوں نے کہا کہ جب مرڈر فلم آئی اُس وقت لوگ بہت تنگ نظر تھے ، مجھے تو انڈسٹری میں اور میڈیا نے کافی ذہنی اذیت دی۔

واضح رہے کہ ملیکہ شیراوت اب رجت کپور کی فلم ’آرکے، آرکے‘ میں جلوہ گر ہو رہی ہیں، جو 22 جولائی کو ریلیز کے لیے تیار ہے۔