مشہور امریکن گلوکارآر کیلی کو بچوں سمیت اپنے نوجوان مداحوں کے ساتھ جنسی زیادتی کرنے پر 30 سال قید کی سزا  اور  1لاکھ ڈالر جرمانے کی سزا سنائی گئی ہے۔

گزشتہ سال نیویارک کی ایک جیوری نے 55 سالہ گلوکار جن کا اصل نام ’رابرٹ سلویسٹر کیلی‘ ہے کو جنسی اسمگلنگ کے مقدمے میں تمام الزامات کا مجرم پایا تھا۔

ان الزامات میں کم عمر مداحوں کے جنسی استحصال، اغوا، جبری مشقت، مین ایکٹ کی خلاف ورزی،دھوکہ دہی اور غیر اخلاقی مقاصد کے لئے لوگوں کی نقل و حمل شامل ہے۔

 عدالت میں وضاحت کرتے ہوئے متعدد متاثرین نے انکشاف کیا کہ گلوکار نے اپنی شہرت کا استعمال انہیں پھنسانے کے لیے کیا اور بعد میں انہیں اپنی جنسی تسکین کے لیے استعمال کیا۔

عدالت کے فیصلے سنانے کے بعد گلوکار نے کوئی ردعمل ظاہر نہیں کیا، تاہم گریمی  ایوارڈ جیتنے والےگلوکار  نے ان الزامات کی تردید کی ہے اور اپنی سزا کے خلاف اپیل دائر کرنے کا فیصلہ کیا ہے۔

واضح رہے کہ یہ سزا چھ ہفتوں کے طویل مقدمے کی سماعت کے بعد سامنے آئی ہے جسے پہلے عالمی وبا کورونا وائرس  کی وجہ سے تاخیر کا سامنا کرنا پڑا تھا۔

فیصلے کے بعد متاثرین کے لواحقین نے عدالت کے باہر جشن منایا اور ملک کے عدالتی نظام کی تعریف کی۔