بھارت کے لیجنڈری اداکار مرحوم دلیپ کمار (یوسف خان) کی بیوہ سائرہ بانو نے شوہر کی پہلی برسی سے قبل جذباتی نوٹ تحریر کیا ہے۔

دلیپ کمار کی برسی سے ایک روز قبل بھارتی میڈیا کو لکھے گئے اپنے جذباتی نوٹ میں سائرہ بانو نے لکھا کہ جب بھی وہ نیند سے بیدار ہوتی ہیں تو دوبارہ اپنا چہرہ تکیے میں رکھ کر اس خیال سے آنکھیں بند کرلیتی ہیں کہ اگر دوبارہ آنکھیں کھولیں تو ان کے سامنے ان کے شوہر موجود ہوں۔

انہوں نے اپنے نوٹ میں جینے کی وجہ اپنی یادوں کو قرار دیا۔

اداکارہ کا لکھنا تھا کہ دنیا یہ بات جانتی ہے میں یوسف کی محبت میں 12 سال کی عمر میں گرفتار ہوئی تھی اور میں اسی خواب کے ساتھ بڑی ہوئی کہ یہ وہ واحد مرد ہے جو میرے لیے سب سے بہتر ہے۔

سائرہ بانو نے لکھا کہ جب یہ خواب حقیقت کو پہنچا تو مجھے معلوم تھا کہ میں اکیلی ان کی مداح نہیں ہوں بلکہ خواتین کی ایک لمبی قطار تھی جو بیگم دلیپ کمار بننے کی امید میں تھیں۔

انہوں نے لکھا کہ میں اس بات کا اعتراف کروں گی کہ میں اپنے آپ کو بہت ہی خوش قسمت خاتون سمجھتی ہوں کیونکہ میرا یوسف 56 سال تک میرے پاس رہا۔

اداکارہ نے لکھا کہ کوئی ایسا دن نہیں جس میں دلیپ ان کی آنکھوں میں موجود نہ ہوں۔

سائرہ بانو نے لکھا کہ اگر کوئی دلیپ کمار کی فلم دیکھے یا ان کے گیت سنے یا پھر ان کا ذکر کرے تو وہ ان افراد کے ساتھ نہیں بیٹھتیں کیوںکہ وہ اپنے آنسو نہیں روک پاتیں۔

واضح رہے کہ دلیپ کمار طویل علالت کے بعد 7 جولائی 2021 کو ممبئی میں انتقال کر گئے تھے، انہوں نے سوگواران میں اہلیہ سائرہ بانو کو چھوڑا۔

سائرہ بانو بھی بالی ووڈ کے سنہرے دور کی اداکارہ ہیں، ان کی اور دلیپ کمار کی 1966 میں شادی ہوئی۔