پاکستانی اداکارہ ماہم عامر نے کہا ہے کہ ہماری انڈسٹری میں فالوورز کی تعداد دیکھ کر کام دیا جاتا ہے۔

اداکارہ کی جانب سے اپنی انسٹاگرام اسٹوری میں ایک پوسٹ شئیر کی گئی ہے۔

ماہم عامر نے لکھا کہ اس انڈسٹری کا حال یہ ہے کہ یہاں پہلے آپ کو پراجیکٹ کے لیے چُن لیا جائے گا اور پھر یہ کہہ کر کاسٹ نہیں کیا جائے گا کہ آپ کے سوشل میڈیا فالوورز کی تعداد کم ہے۔

اُنہوں نے لکھا کہ کوئی اب یہ بھی بتا دے کہ آرٹسٹ کا جو وقت ضائع ہوتا ہے، اُس کا کیا کِیا جائے۔

واضح رہے کہ سینئر اداکارہ فضیلہ قاضی نے بھی کہا تھا کہ ایوارڈ شوز میں صرف اُنہی کو بُلایا جاتا ہے جن کے سوشل میڈیا فالوورز زیادہ ہوں۔

اُنہوں نے لکھا تھا کہ شوبز ویسے ہی جعلی دُنیا ہے لیکن اب سوشل میڈیا کی وجہ سے یہ انڈسٹری مزید جعلی ہوگئی ہے۔

اس سے قبل اداکارہ نے اپنے  وزن کے بارے میں تبصرے کرنے والے ناقدین کو کرارا جواب دیا تھا۔

انہوں نے لکھا تھا کہ یہ کہنا صحیح نہیں کہ آپ صحت مند ہو گئی ہیں، وزن کچھ بڑھ نہیں گیا، اوہ بے بی کو ہوئے اتنا وقت گزر گیا ہے ابھی تک وزن کم نہیں کیا، آپ کافی مختلف لگ رہی ہیں، آپ کافی بڑی لگ رہی ہیں۔

ماہم عامر نے کہا کہ یہ سارے سوال اس انسان سے نہیں پوچھنے چاہئیے جس کا ایک بچہ ہو، براہ مہربانی اس طرح کے سوالات مت پوچھا کریں کچھ خدا کا خوف کریں۔

خیال رہے کہ اداکارہ ماہم عامر کی شادی اداکار فیضان شیخ کے ساتھ 2018ء میں ہوئی تھی اور دسمبر 2021ء میں اس جوڑے کے ہاں بیٹی کی پیدائش ہوئی۔