پاکستان فلم و ٹی وی انڈسٹری کے معروف اداکار ہمایوں سعید نے اپنے کیریئر کی شروعات میں پیش آنے والی مشکلات کے بارے میں مداحوں کو بتادیا۔

اداکار نے ایک انٹرویو کے دوران اپنی کامیابی اور شروعات کے بارے میں بات کرتے ہوئے بتایا کہ ان کے لیے انڈسٹری میں قدم رکھنا آسان نہیں تھا اور اس کے لیے انہیں کافی جدوجہد کرنی پڑی۔

ہمایوں سعید کا کہنا تھا کہ ایک دفعہ مجھے ایک آدمی نے پیشکش کی کہ اگر میں اس کے سیریل کے لیے 1 لاکھ 50 ہزار روپے کا بندوبست کرلوں تو وہ مجھے ہیرو بنا دے گا۔

انہوں نے کہا کہ میں نے اپنے دوست سے رقم ادھار لی اور پھر ڈرامہ بنانے والے نے مزید رقم کا مطالبہ کیا جس کا بندوبست میں نے کیا اور ہم نے ایک سیریل بنایا۔

ہمایوں سعید نے بتایا کہ جب اُس ڈرامے کی ایڈیٹنگ ہورہی تھی تو مقبول پروڈیوسر تسنیم اسلم نے ڈرامے کے کلپس دیکھے اور کہا کہ ڈرامہ بہت بُرا ہے لیکن تمہاری اداکاری بہترین ہے۔

اُنہوں نے کہا کہ تسنیم اسلم سے ملاقات کے بعد اداکاری کی دُنیا میں میرے کیریئر کی شروعات ہوئی۔

واضح رہے کہ اداکار ہمایوں سعید ایک شاندار پاکستانی اداکار ہیں جنہوں نے انڈسٹری میں آنے کے فوراً بعد ہی زبردست شہرت اور کامیابی حاصل کی۔

اُنہوں نے کئی ہٹ ڈرامے اور فلمیں کی ہیں اور وہ پاکستان کے سب سے بڑے پروڈیوسرز میں سے ایک ہیں۔