بالی ووڈ اداکار رنویر سنگھ کا برہنہ فوٹو شوٹ کرنے والے فوٹوگرافر کا بیان سامنے آگیا ہے۔

اشیش شاہ نامی فوٹو گرافر نے ای ٹائمز سے گفتگو کرتے ہوئے بتایا کہ جب میری اور رنویر کی ملاقات ہوئی ،اس وقت ہماری اچھی بات چیت شروع ہوگئی۔

اشیش شاہ نے بتایا کہ فوٹو شوٹ کے دوران رنویر نہ تو گھبرائے اور نہ ہی انہوں نے کوئی شرم محسوس کی۔

فوٹو گرافر نے کہا کہ ہم دونوں ایک دوسرے کی عزت و احترام کرتے ہیں، سچ پوچھیں تو میں کسی مشہور شخصیت کے شوٹ کے لیے رضامند نہیں ہوتا جب تک ہم دونوں ایک دوسرے کے ساتھ آرام دہ محسوس نہ کریں۔

اشیش نے بتایا کہ اکثر معروف اداکاروں کے ساتھ کام کرنے سے ڈر لگتا ہے، ان کے ارد گرد آپ کو ان کی مرضی کے مطابق ہونا پڑتا ہے لیکن رنویر کے ساتھ ایسا نہیں تھا، وہ انتہائی اچھے اخلاق کے مالک ہیں اور شوٹنگ کے دوران ہم نے بہت باتیں کیں، انہوں نے مجھے اپنی فلموں کے بارے میں بتایا۔

اشیش کا کہنا تھا کہ یہ سب بہتر ذوق اور اچھی نیت سے کیا گیا تھا لیکن ہمیشہ  لوگوں کا ایک مخصوص طبقہ رہے گا جو اسے پسند نہیں کرے گا،  کیا ٹوئٹر اور انسٹاگرام کے لوگ یہ ہی نہیں چاہتے؟، کیا ہم سب اسی طرح پیدا نہیں ہوئے؟

واضح رہے کہ رنویر سنگھ نے ایک میگزین کے لیے عریاں فوٹو شوٹ کروایا جس پر تنقید کی جارہی ہے اور معاملہ پولیس کے پاس بھی پہنچ چکا ہے تاہم اداکار کی جانب سے تاحال اس فوٹو شوٹ کے بارے میں بات نہیں کی گئی۔