ایم کیو ایم پاکستان کے رہنما خواجہ اظہار الحسن نے کہا ہے کہ بدترین کارکردگی میں کراچی پانچویں نمبر پر ہے۔

تفصیلات کے مطابق ایم کیو ایم پاکستان کے رہنما خواجہ اظہار الحسن نے میڈیا سے گفتگو کرتے ہوئے کہا ہے کہ ہم نظام کی بات کرر ہے ہیں میئر کی نہیں، ہم شہر میں نظام مانگ رہے ہیں۔

انہوں نے کہا کہ بدترین کارکردگی میں کراچی پانچویں نمبر پر ہے، عمران خان سے بھی گزارش ہے کہ کراچی کیلئے وقت دیں، صدرمملکت کا تعلق بھی کراچی سے ہے لیکن4سال سے خاموش ہیں۔

خواجہ اظہار الحسن نے کہا ہے کہ شہر میں فوری سیوریج لائن کا نیا انفراسٹرکچر بنایا جائے، کراچی میں کچی آبادیاں بہت ہیں جس وجہ سے سیوریج مسئلہ بنا ہوا ہے، جتنا زیادہ کراچی کو تقسیم کیا جا رہا ہے مسائل بڑھ رہے ہیں۔

ایم کیو ایم پاکستان کے رہنما نے کہا کہ پریس کانفرنس میں مراد علی شاہ نے لندن کی مثال دی، جواب دیں یوسی 6 نیو کراچی میں آلائشیں کیوں پڑی ہیں، پی ٹی آئی کہتی ہے ہم سے الگ ہوئے تو بارشیں ہو گئیں، اگرساتھ ہوتے تو کیا گٹر کا سارا پانی پی لیتے؟

انہوں نے کہا کہ حالیہ بارشوں میں ڈیفنس کا حال بہت برا ہے، ڈیفنس میں بارش کا پانی ابھی تک نہیں نکلا، مسائل بتائیں تو اسکا حل بھی بتائیں، ذمہ داری انکی عائد ہوتی ہے جن کے پاس اختیارات ہیں۔

خواجہ اظہار الحسن نے کہا ہے کہ کراچی شہرمیں ادارے بھی تقسیم ہیں، ان سب اداروں کا باس وزیراعلیٰ ہے، لندن کی مثال دیں لیکن شہرکو ویسا بنائیں بھی، حکومت سے معاہدہ کراچی کیلئے کیا ہے۔

ایم کیو ایم پاکستان کے رہنما نے کہا کہ معاہدے سے جماعت اسلامی کو تکلیف ہے، ہم نے پیپلزپارٹی اور حکومت کوکوئی چھوٹ نہیں دی۔