بالی ووڈ کے معروف اداکار ٹائیگر شروف اور اداکارہ دیشا پٹانی کی راہیں جدا ہونے کی وجہ سامنے آگئی ہے۔

ٹائیگر اور دیشا کے بارے میں قیاس آرائیاں کی جارہی تھیں کہ دونوں جلد ہی ایک ہوجائیں گے مگر اب یہ خبریں گردش کررہی ہیں کہ 6 سال بعد دونوں نے راہیں جدا کرلیں ہیں۔

ہندوستان ٹائمز کی ایک رپورٹ کے مطابق اداکار ٹائیگر اور دیشا کئی سالوں سے ایک دوسرے کے ساتھ  تعلقات میں تھے جس کی تصدیق ان کے قریبی دوست نے کی ہے۔

میڈیا سے گفتگو کرتے ہوئے انہوں نے بتایا کہ دونوں کافی عرصے سے ایک دوسرے کے ساتھ رہ رہے تھے۔

ٹائیگر شروف کے قریبی دوست نے بتایا کہ دیشا نے ٹائیگر سے شادی کرنے کی بات کی تھی مگر ٹائیگر ابھی کسی قسم کی کمٹمنٹ نہیں کرنا چاہتے، جس بنا پر دونوں نے اپنی راہیں جدا کرلی ہیں۔

ان کے دوست نے کہا کہ اداکار ٹائیگر شروف بریک اپ کے بعد کسی قسم کے تناؤ میں نہیں ہیں اور وہ اپنے کام پر فوکس کیے ہوئے ہیں۔

اس سے قبل بالی ووڈ کے سینئر اداکار جیکی شروف کا اپنے بیٹے ٹائیگر شروف اور دیشا پاٹنی کے بریک اپ کی خبروں پر ردِ عمل سامنے آیا تھا۔

انڈیا ٹوڈے  کے مطابق جیکی شروف نے اپنے ایک انٹرویو میں کہا تھا کہ انہوں نے ٹائیگر اور دیشا کو باہر جاتے ہوئے دیکھا ہے، یہ نہیں ہے کہ وہ اپنے بیٹے کی لو لائف کا ٹریک رکھتے ہیں بلکہ یہ وہ آخری چیز ہوگی جو وہ کریں گے اور وہ ان کی پرائیویسی کا احترام کرتے ہیں۔

اداکار کا کہنا تھا کہ انہیں لگتا ہے وہ بہت قریبی دوست ہیں اور دونوں کام کے علاوہ بھی ایک دوسرے کے ساتھ وقت گزارتے ہیں۔

جیکی شروف نے دوران انٹرویو بتایا کہ یہ دیشا اور ٹائیگر پر منحصر ہے کہ وہ دونوں ساتھ ہیں یا نہیں، دونوں ایک دوسرے کے لیے ٹھیک ہیں یا نہیں اور یہ ان کی لو اسٹوری ہے، جیسے میری اور میری بیوی کی اپنی لو اسٹوری ہے۔

انہوں نے کہا تھا کہ ٹائیگر اور دیشا میں اچھا تعلق رہے، دونوں ہی ایک دوسرے سے خوش ہیں اور وہ ملاقاتیں کرتے، گپیں ہانکتے ہیں۔