بھارت کے معروف ہدایت کار و اداکار فرحان اختر نے مسلم سپر ہیرو سیریز مس مارول میں مرکزی کردار ادا کرنے والی پاکستانی نژاد کینیڈین اداکارہ ایمان ویلانی کی اداکاری کی تعریف کی ہے۔

حال ہی میں فرحان اختر نے اپنے ایک انٹرویو میں سیریز مس مارول میں کام کرنے کے تجربے کے بارے میں بات کرتے ہوئے کہا کہ میں اپنے آپ کو خوش قسمت سمجھتا ہوں کہ مجھے مارول اسٹوڈیوز کے پہلے ہی مسلم سپر ہیرو شو کا حصّہ بننے کا موقع ملا۔

اداکار کا کہنا تھا کہ یہ سیریز اس طرح کے مزید شوز بنانے کے لیے دروازے کھولے گی۔

فرحان اختر نے بتایا کہ میرے سیریز کی کاسٹ میں شامل ہونے سے پہلے ہی بہت سا کام سیریز کے مصنفین، ڈائریکٹر شرمین عبید چنائے اور ایگزیکٹو پروڈیوسر ثناء امانت نے کر لیا تھا۔

انہوں نے ایمان ویلانی کی تعریف کرتے ہوئے کہا کہ میرا کمالہ خان کے لیے وہاں موجود ہونا واقعی بہت اہم تھا اور اسی لیے بطور ایک اداکار میرے لیے ایمان ویلانی کی وہاں موجودگی اہم تھی۔

اداکار نے بتایا کہ پہلی مسلم سپر ہیرو کو مداحوں کی جانب سے بہت محبت مل رہی ہے اور اُنہوں نے اس شو میں ناقابلِ یقین اداکاری کی ہے، ایمان ویلانی قدرتی طور پر ہی ایک ہنر مند اداکارہ ہیں۔

فرحان اختر نے اپنے کردار کے بارے میں بتایا کہ ولید کو کمالہ کے علم کے علاوہ سامعین کو یہ احساس دلانے پر بھی توجہ مرکوز کرنی تھی کہ ولید کو صرف ایک چُوڑی (Bangle) سے ہی نہیں بلکہ کمالہ سے بھی محبت ہے اور وہ یہ بات جانتا ہے کہ کمالہ میں کوئی خاص بات ضرور ہے۔

اُنہوں نے کہا کہ اس سیریز میں یہ بھی دیکھنے کو ملا کہ تقسیم کے وقت ہندوستان اور پاکستان کے درمیان کیا ہوا لیکن اسے سیریز میں موجود کرداروں کی زندگی کے ساتھ کس طرح باضابطہ طور پر جوڑا  گیا ہے، یہ دیکھنا بھی ضروری ہے۔

واضح رہے کہ سیریز مس مارول نامور پروڈکشن بینر مارول سنیمیٹک اسٹوڈیوز کی پہلی مسلم سپر ہیرو سیریز ہے جو اسٹریمنگ سروس ڈزنی پلس ہاٹ اسٹار پر ریلیز کی گئی ہے۔