بالی ووڈ کی معروف اداکارہ رانی مکھرجی نے پروڈیوسر اور اداکار کرن جوہر کے حوالے سے اہم انکشاف کردیا۔

غیر ملکی خبررساں ادارے کے مطابق اداکارہ رانی مکھرجی نے بتایا کہ جب انہیں کرن جوہر کی 2003 کی فلم ’کل ہو نہ ہو‘ میں کاسٹ نہیں کیا گیا تھا تو وہ بالی ووڈ سپر اسٹار عامر خان کے سامنے رو پڑیں تھیں۔

2004 میں کرن جوہر کے ٹاک شو ’کافی ود کرن‘ میں گفتگو کے دوران رانی نے یہ بات بتائی تھی۔

رانی کا کہنا تھا کہ فلم میں رول نہ ملنے پر وہ سخت دل برداشتہ ہوئیں اور آبدیدہ ہوگئی تھیں۔

رانی مکھرجی نے پروگرام کے دوران کرن سے کہا تھا  کہ انہیں افسوس اس بات پر ہوا کہ آپ (کرن جوہر) نے مجھ سے یہ تک ڈسکس نہیں کیا کہ آپ میری جگہ کسی اور کو لے رہے ہیں اور مجھے یہ بات کہیں اور سے پتہ چلی۔

میں سمجھتی تھی کہ میں آپ سے کافی قریب ہوں لیکن پھر بھی مجھ سے یہ تذکرہ نہیں کیا گیا۔

تاہم کرن کا کہنا تھا کہ انہیں واقعی اس بارے میں کچھ معلوم نہیں تھا خاص کر یہ کہ آپ کو رونے کے لیے عامر خان نے اپنا کاندھا دیا۔

واضح رہے کہ کل ہو نہ ہو میں پریتی زنٹا، شاہ رخ خان، سیف علی خان اور جیا بچن مرکزی کرداروں میں نظر آئے۔