بالی ووڈ اداکار اکشے کمار اپنی بہن کا پیغام سن کر جذباتی ہوگئے۔

اداکار نے ریالٹی پروگرام سپر اسٹار سنگر 2 میں بطور مہمان شرکت کی جہاں انہیں بہن الکا بھاٹیہ کا سرپرائز آڈیو پیغام سنایا گیا۔

چینل نے اپنے انسٹاگرام اکاؤنٹ پر بھی یہ آڈیو کلپ شیئر کیا ہے جس میں اکشے کمار اپنی بہن کا پیغام سننے کے بعد آبدیدہ دکھائی دے رہے ہیں۔

کلپ میں پروگرام میں حصہ لینے والی ایک گلوکارہ کو بہن بھائی کی محبت کا گانا پھولوں کا تاروں کا سب کا کہنا ہے گاتے دکھایا گیا، جس کے فوری بعد اکشے کمار کی بہن الکا کی آواز میں ایک پیغام آتا ہے جسے سن کر اکشے کمار رونے لگے۔

اداکار کی بہن نے انہیں راجو کے نام سے پکارتے ہوئے پنجابی میں کہا کہ اچھا وقت ہو یا برا، تم ہمیشہ میرے ساتھ رہے، ایک بھائی کے ساتھ، باپ اور دوست کا رشتہ بھی تم نے ہمیشہ میرے لیے نبھایا ہے، ہر چیز کےلیے شکریہ۔

اکشے کمار یہ آڈیو پیغام سننے کے بعد جذباتی ہوگئے اور بتایا کہ ہم ایک چھوٹے سے گھر میں رہتے تھے لیکن بہن کے آنے کے بعد ہماری زندگی بدل گئی، دنیا میں ایک بہن کے تعلق سے بڑا کوئی نہیں ہے، ایسا کوئی نہیں ہے جو ایک بہن سے زیادہ آپ کو پیار کرسکے۔

واضح رہے کہ اکشے کمار آج کل اپنی آنے والی فلم رکھشا بندھن کی پروموشن میں مصروف ہیں جو 11 اگست کو ریلیز ہوگی جس کی کہانی بھائی اور بہنوں کی محبت پر مبنی ہے۔