پاکستان کے نامور اداکار و میزبان تابش ہاشمی کو منال خان کو ٹرول کرنا مہنگا پڑگیا۔

حال ہی میں تابش ہاشمی نے اداکار آغا اور حنا الطاف کو اپنے شو میں مدعو کیا، اس دوران انہوں نے منال خان کا کائلی جینر کی انسٹا اسٹوری کو بے دریغ چوری کرنے کا موضوع اٹھایا اوراداکارہ کا مذاق اڑاتے ہوئے ٹرول کیا تاہم، آغا اور حنا نے اس پر خاموشی اختیار کی۔

تابش کا منال خان کو ٹرول کرنے کا کلپ سوشل میڈیا پر وائرل ہوگیا ہے جسے دیکھنے کے بعد سوشل میڈیا صارفین انہیں شدید تنقید کا نشانہ بنا رہے ہیں اور مختلف تبصرے بھی جاری ہے۔

اس سے قبل تابش ہاشمی کا کہنا تھا کہ کیمرے پر آنے کا خواہش مند نہیں تھا اور نہ ہی مشہور ہونا چاہتا تھا۔

ایک انٹریو کے دوران انہوں نے کہا کہ ابتدائی طور پر میں نے اپنے کیریئر کا آغاز ایک نوکری سے کیا تھا لیکن اس وقت بھی سائیڈ پر لائیو شوز کرتا تھا تاہم کیمرے پر آنے کی خواہش نہیں تھی۔

تابش ہاشمی نے کہا کہ پاکستان میں عام طور پر یہ سمجھا جاتا ہے کہ دوسروں کو ہنسانے والا انسان کبھی سنجیدہ نہیں ہوسکتا اور نہ ہی سنجیدہ کام کرسکتا ہے اور آفس والے بھی اسے سنجیدہ نہیں لیتے ہیں، یہی وجہ ہے کہ ٹی وی پر نہیں آنا چاہتا تھا۔

اسٹینڈ اپ کامیڈین نے کہا کہ کینیڈا جانے سے پہلے سوچا کہ کچھ ایسا کرنا چاہئیے جس سے لوگوں کے دلوں میں میری جگہ بن جائے تاہم ٹی وی پر آنے کی خواہش نہیں تھی البتہ اسٹیج پر پرفارم کرکے لطف اندوز ہوتا تھا۔

میزبان تابش کا کہنا تھا کہ کینیڈا جانے سے پہلے اداکار ظفر علی نے مجھے ایک موقع دیا اور مجھ پر جوا کھیلتے ہوئے ایک شو ڈیزائن کیا جس میں ہمیں کامیابی مل گئی۔

انہوں نے کہا کہ لائیو شو میں میری کارکردگی سوالوں پر انحصار نہیں کرتی بلکہ یہاں تک آنے کے لیے میں نے 16 سے 17 سال تیاری کررکھی تھی، سوال صرف اس لیے دیے جاتے ہیں، اگر کبھی کوئی سوال ذہن میں نہیں آئے تو ایک آدھ سوال دیکھ لوں۔