رکنِ قومی اسمبلی و میزبان ڈاکٹر عامر لیاقت کی تیسری اہلیہ دانیہ ملک کی والدہ سلمیٰ بی بی نے سب راز فاش کردیئے ہیں۔

 سلمیٰ بی بی نے اپنے انسٹاگرام اکاؤنٹ پر ایک ویڈیو پیغام جاری کیا ہے جس میں انہوں نے دعویٰ کیا ہے کہ اُن کے ساتھ دھوکا ہوا ہے جو کہ یاسر شامی (ڈیجیٹل پلیٹ فارم کے صحافی) نے کیا ہے، عامر لیاقت کی ویڈیو یاسر شامی نے لیک کی تھی۔

انہوں نے بتایا کہ جب یاسر شامی انٹرویو کے لیے آیا تھا تو اُس نے عامر لیاقت کے خلاف باتیں کی تھیں اور کہا تھا کہ اس شخص کو اپنی بیٹی نہیں دیجئے گا ورنہ یہ آپ کی بیٹی کا حال بشریٰ اور طوبیٰ جیسا کر دے گا۔

دانیہ کی والدہ نے اپنے ویڈیو پیغام میں کہا کہ مجھے نہیں معلوم تھا یاسر شامی طوبیٰ اور بشریٰ کی طرف سے آیا ہے، انہوں نے مل کر سب کیا ہے اور یہ ایک گینگ ہے، میری مدد کریں۔

سلمیٰ بی بی نے کہا کہ میری بیٹی کی عمر 18 سال ہے، وہ اس عمر میں بیوہ ہو گئی ہے اور اُس پر بہت الزامات لگائے گئے ہیں،  میں اکیلی بے سہارا عورت ہوں، ہمارا ساتھ دیں، ہمارے ساتھ دھوکا ہوا ہے۔

انہوں نے دعویٰ کیا ہے کہ میں نے عامر لیاقت کو آگاہ کر دیا تھا کہ ویڈیو یاسر شامی نے لیک کی ہے۔

اس سے قبل دانیہ شاہ کی والدہ کا کہنا تھا کہ عامر لیاقت کو پیسوں کی وجہ سے قتل کیا گیا ہے۔

 دانیہ شاہ کی والدہ نے وکیل کے ہمراہ بہاولپور میں پریس کانفرنس کرتے ہوئے کہا تھا کہ انہیں کروڑوں روپے کے لیے قتل کیا گیا ہے۔

  انہوں نے مطالبہ کیا کہ ان کے داماد کا موبائل فون برآمد کیا جائے، اس کے ڈیٹا سے سب کچھ سامنے آجائے گا۔

واضح رہے کہ مشہور ٹیلی ویژن میزبان اور سیاستدان عامر لیاقت حسین 9 جون 2022 کو کراچی میں اپنی رہائش گاہ پر انتقال کر گئے۔