بالی ووڈ کے معروف اداکار رنویر سنگھ بڑی مشکل میں پھنس گئے۔

حال ہی میں اداکار نے ایک برہنہ فوٹو شوٹ کروایا تھا جس کے بعد رنویر سنگھ کے خلاف ایف آئی آر بھی کٹوائی گئی۔

اب ایک شخص نے کلکتہ ہائی کورٹ سے رجوع کیا ہے اور استدعا کی ہے کہ ریاست مغربی بنگال کی حکومت کو رنویر سنگھ کے برہنہ فوٹوشوٹ کی تمام پرنٹ فوٹوکاپیاں ضبط کرنے کا حکم دیا جائے۔

کلکتہ ہائی کورٹ میں یہ درخواست خاتون وکیل نازیہ الٰہی خان کی طرف سے دائر کی گئی ہے، نازیہ الٰہی نے درخواست میں موقف اختیار کیا ہے کہ عوام کی اکثریت کی نظر میں رنویر سنگھ کی تصاویر فحاش اور قابل اعتراض ہیں لہٰذا ریاستی حکومت کو اس فوٹو شوٹ کی پرنٹ کاپیاں ضبط کرنے اور میگزین کی ویب سائٹ کو مغربی بنگال میں بلاک کرنے کا حکم دیا جائے۔

یاد رہے کہ اداکار کی جانب سے کروائے گئے برہنہ فوٹو شوٹ کے بعد 26 جولائی کو بھارتی ریاست مہاراشٹر کے شہر ممبئی کی ایک نان گورنمنٹ آرگنائزیشن (این جی او) نے پولیس کو مقدمہ دائر کرنے کی درخواست جمع کروائی تھی۔

بھارتی میڈیا کے مطابق این جی او کی درخواست پر ممبئی پولیس نے اسی روز ہی اداکار کے خلاف تعزیرات ہند اور انفارمیشن ٹیکنالوجی ایکٹ کی دفعات کے تحت مقدمہ دائر کیا تھا۔

پولیس نے بتایا تھا کہ تفتیش سے معلوم ہوا ہے رنویر سنگھ نے بھاری رقم کے عوض کم عمر بچوں اور سماج پر پڑنے والے منفی اثرات کے لیے فوٹوشوٹ کروایا ہے۔