معروف بھارتی کامیڈین راجو شری واستو کی طبیعت میں علاج کے بعد بھی کوئی بہتری نہیں آئی۔

بھارتی میڈیا کی رپورٹس کے مطابق دہلی کے آل انڈیا انسٹیٹیوٹ آف میڈیکل سائنسز (اے آئی آئی ایم ایس) اسپتال کے ذرائع کا کہنا ہے کہ کامیڈین کی طبیعت میں صرف تھوڑی سی بہتری نظر آئی تھی کیونکہ ان کی بگڑتی ہوئی طبیعت پر قابو پانے کے لیے کچھ معاون دوائیں دی گئی تھیں جوکہ فی الحال روک دی گئی ہیں۔

ذرائع کے مطابق وہ اب بھی وینٹیلیٹر پر ہی ہیں اور ان کا دماغ علاج کا کوئی جواب نہیں دے رہا۔

راجو شری واستو کے بزنس مینیجر نے ایک بیان میں کہا ہے کہ کامیڈین کی صحت میں زیادہ بہتری نہیں آئی، اُنہیں ابھی تک ہوش نہیں آیا اور ڈاکٹرز کا کہنا ہے کہ ان کا دماغ کام نہیں کررہا، اس لیے کچھ وقت انتظار کرنا پڑے گا۔

انہوں نے راجو شری کے مداحوں سے جلد صحتیابی کے لیے دعا کرنے کی اپیل بھی کی ہے۔

دوسری جانب اداکارہ سمبھاونا سیٹھ نے مائیکرو بلاگنگ ویب سائٹ ٹوئٹر پر کامیڈین کی صحت کے بارے میں لکھا ہے کہ وہ کامیڈین کی فیملی کے ساتھ رابطے میں ہیں،ان کی اہلیہ کا کہنا ہے کہ اب راجو سری کی صحت میں بہتری کے آثار نظر آرہے ہیں۔

Hey Everyone..I am very much in touch with Raju ji s Family..Spoke to his Wife and he is showing signs of improvement..lets all pray for his speedy recovery instead of spreading false news #RajuSrivastava pic.twitter.com/vn8Wox2q9c

— Sambhavna Seth (@sambhavnaseth) August 12, 2022

سمبھاونا سیٹھ نے اپنے ٹوئٹ میں اپیل کی ہے کہ آئیے، سب لوگ جھوٹی خبریں پھیلانے کے بجائے کامیڈین کی جلد صحتیابی کے لیے دعا کریں۔

واضح رہے کہ راجو شری واستو کو ورزش کے دوران اچانک دل میں تکلیف محسوس ہوئی جس کے باعث انہیں طبی امداد کے لیے اسپتال منتقل کیا گیا جہاں ڈاکٹرز نے تصدیق کی کہ انہیں دل کا دورہ پڑا ہے۔

ڈاکٹرز کا کہنا ہے کہ کامیڈین راجو کی طبیعت سنبھل نہیں رہی جس کی وجہ سے انہیں وینٹیلیٹر پر منتقل کردیا گیا، اداکار کی جان خطرے میں ہے اور ان کا علاج جاری ہے۔

گزشتہ روز معروف کامیڈین کے پرسنل اسسٹنٹ اجیت سکسینہ نے آگاہ کیا تھا کہ راجو سری واستو کی طبعیت میں بہتری آرہی ہے جبکہ آج یہ خبر آرہی ہے کہ ان کی طبیعت بہت زیادہ خراب ہے۔

یاد رہے کہ راجو شری واستو نے مقامی لافٹر شو سے شہرت حاصل کی جس کے بعد وہ سیاست میں بھی سرگرم ہوگئے۔

معروف کامیڈین کا شمار اس وقت بی جے پی کے اہم رہنماؤں میں ہوتا ہے، راجو سری واستو پارٹی کے کچھ اہم رہنماؤں سے ملاقات کے لئے دہلی پہنچے تھے جہاں ان کو دل کا دورہ پڑا۔