ہانگ کانگ میں معروف میوزک بوائے بینڈ مرر کے کانسرٹ کے دوران بڑی اسکرین ڈانسرز پر گر گئی۔

غیر ملکی خبر رساں ادارے کے مطابق کانسرٹ کے دوران اسٹیج پر لگی بڑی اسکرین گرنے سے دو ڈانسرز جبکہ 3 شرکاء شدید زخمی ہوگئے جن میں سے ایک کی حالت تشویشناک بتائی جا رہی ہے۔

اس واقعے سے متعلق بات کرتے ہوئے ہانگ کانگ کے چیف ایگزیکٹو جان لی نے کہا کہ میں اس واقعے پر حیران و پریشان ہوں، میری دعائیں حادثے میں زخمی ہونے والے افراد کے ساتھ ہیں۔

انہوں نے کہا کہ حکومت اس معاملے پر تحقیقات کرے گی جبکہ فن کاروں، اسٹاف اور شرکاء کے تحفظ کے لیے حفاظتی طریقہ کار کا جائزہ بھی لیا جائے گا۔

دوسری جانب شہر کے کلچر سیکریٹری کیون یوئنگ کا کہنا ہے کہ جب تک اسٹیج کا ڈھانچہ محفوظ نہیں ہو جاتا اس وقت تک شوز کو معطل رکھا جائے گا۔

انہوں نے کہا کہ یہ کوئی پہلا واقعہ نہیں ہے ،حکومت کے تفریحی بیورو نے حالیہ دنوں میں ہونے والے دیگر اسٹیج حادثات کے بارے میں پہلے ہی کانسرٹ کے منتظم سے رابطہ کیا تھا۔

یاد رہے کہ میوزک بینڈ مرر کے 13 ہزار سے زائد مداحوں نے ایک پٹیشن پر دستخط کیے ہیں جس میں کانسرٹ انتظامیہ سے تمام پرفارمرز کی حفاظت اور اس سے متعلق مسائل کو حل کرنے کے لیے کہا گیا ہے۔

تاہم کانسرٹ انتظامیہ میکر وِل کا کہنا ہے کہ وہ اس واقعہ کی وجہ جاننے کے لیے تحقیقات کر رہے ہیں۔

انتظامیہ کا کہنا ہے کہ ہم اس واقعے کی وجہ سے ناظرین اور دیگر افراد کو پہنچنے والے دکھ کے لیے معذرت خواہ ہیں۔