معروف بھارتی کامیڈین راجو سری واستو کی طبیعت میں بہتری آنے لگی ہے۔

کامیڈین کے مینیجر نین سونی کا بتانا ہے کہ راجو سری واستو کی صحت میں آہستہ آہستہ بہتری آ رہی ہے، اب وہ اپنے جسم کو خود حرکت دے پا رہے ہیں۔

نین سونی کا کہنا ہے کہ راجو تاحال آئی سی یو میں وینٹیلیٹر پر ہی موجود ہیں، ڈاکٹروں کا کہنا ہے کہ راجو سری کو ہوش میں آنے میں تقریباً ایک ہفتہ لگے گا، ہم راجو کی جَلد اور مکمل صحت یابی کے لیے دعا گو ہیں۔

دوسری جانب بھارتی میڈیا کا بتانا ہے کہ اسپتال کی انتظامیہ کی جانب سے راجو کو کسی بھی طرح کے انفیکشن سے بچانے کے لیے تاحال اُن کے خاندان یا قریبی دوستوں کو اُن سے ملنے کی اجازت نہیں ہے۔

واضح رہے کہ راجو سری واستو کو ورزش کے دوران اچانک دل میں تکلیف محسوس ہوئی جس کے باعث انہیں طبی امداد کے لیے اسپتال منتقل کیا گیا جہاں ڈاکٹرز نے تصدیق کی کہ انہیں دل کا دورہ پڑا ہے۔

ڈاکٹرز کا کہنا ہے کہ کامیڈین راجو کی طبیعت سنبھل نہیں رہی جس کی وجہ سے انہیں وینٹیلیٹر پر منتقل کردیا گیا، اداکار کی جان خطرے میں ہے اور ان کا علاج جاری ہے۔

گزشتہ روز معروف کامیڈین کے پرسنل اسسٹنٹ اجیت سکسینہ نے آگاہ کیا تھا کہ راجو سری واستو کی طبعیت میں بہتری آرہی ہے جبکہ آج یہ خبر آرہی ہے کہ ان کی طبیعت بہت زیادہ خراب ہے۔

یاد رہے کہ راجو سری واستو نے مقامی لافٹر شو سے شہرت حاصل کی جس کے بعد وہ سیاست میں بھی سرگرم ہوگئے۔

معروف کامیڈین کا شمار اس وقت بی جے پی کے اہم رہنماؤں میں ہوتا ہے، راجو سری واستو پارٹی کے کچھ اہم رہنماؤں سے ملاقات کے لئے دہلی پہنچے تھے جہاں ان کو دل کا دورہ پڑا۔