آنجہانی ملکہ الزبتھ دوم 96 سال کی عمر میں انتقال کرچکی ہیں جنہوں نے 70 سال تک تختِ برطانیہ پر راج کیا تھا۔

غیر ملکی خبر رساں ادارے کے مطابق الزبتھ دوم کی آخری رسومات پر جو خرچہ آیا، اس حوالے سے حتمی لاگت کا پتہ نہیں چل سکا۔

میڈیا رپورٹس کے مطابق برطانوی حکومت نے اس تقریب کے حوالے سے صحیح قیمت کے بارے میں اب تک بتایا نہیں ہے۔

اس حوالے سے امریکی میڈیا کا کہنا ہے کہ شاہی سیکیورٹی کے ایک سابق افسر نے بتایا ہے کہ ملکہ الزبتھ دوم کی آخری رسومات کے دوران صرف سیکیورٹی پر 7.5 ملین ڈالر سے زیادہ لاگت آئی ہے۔

انہوں نے کہا کہ برطانیہ کا یہ سب سے بڑا پولیسنگ آپریشن تھا جو برطانوی پولیسنگ کی جانب سے کیا گیا۔

سابق افسر کا کہنا ہے کہ لندن میں 2012 کے اولمپکس کی سیکیورٹی پر جتنی لاگت آئی تھی اس سے بھی زیادہ قیمت ملکہ کی آخری رسومات میں لگی ہیں۔

واضح رہے کہ ملکہ الزبتھ دوم کی لندن میں سرکاری طور پر آخری رسومات پیر کے روز ادا کی گئی تھیں، جس میں دنیا بھر سے 500 سربراہان مملکت اور اہم شخصیات کو مدعو کیا گیا تھا۔

اس سے قبل ملکہ الزبتھ دوم کے بارے میں یہ خبر سامنے آئی تھی کہ انہوں نے 70 سال تک اپنا مخصوص ہئیر اسٹائل رکھا،  جس کے پیچھے چھپا راز ہم آپ کو بتائیں گے۔

ملکہ الزبتھ کا ہئیر اسٹائل مہر ڈاک ٹکٹ سے لے کر کرنسی نوٹوں تک ہر جگہ موجود ہے اور انہوں نے اپنے ہئیر اسٹائل کو کبھی تبدیل نہیں کیا۔

ملکہ یہ مخصوص ہئیر کٹ، ہئیر ڈریسر ایان کارمائیکل سے لیتی تھیں ، جو لندن کے کووینٹ گارڈن میں واقع ٹریور سوربے سیلون کے سینئیر اسٹائلسٹ ہیں۔

ہئیراسٹائلسٹ بین کوک کے مطابق ملکہ کا اپنا شیمپو اور سیٹ طریقہ تھا، بالوں کو دھونے کے بعد چھوٹے رولرز اٹالین بوائے تکنیک کے ذریعے مخصوص جگہوں پر لگائے جاتے تھے اور بال سوکھنے کے دوران یہ عمل بار بار دہرایا جاتا تھا۔

اس طویل عرصے میں ملکہ کے بالوں کا رنگ تبدیل ہوا، جو براؤن سے سرمئی اور پھر سفید ہوگیا۔

واضح رہے کہ ملکہ الزبتھ دنیا بھر میں اپنی قابلِ رشک خوبصورتی کے لیے مشہور ہیں، ان کے ملبوسات، جواہرات، جیولری اور اخلاقیات لوگوں کے لیے ایک مثال رہے ہیں۔

یاد رہے کہ ملکہ برطانیہ الزبتھ دوم 96 برس کی عمر میں انتقال کرگئیں۔

ملکہ کو پچھلے سال اکتوبر سے صحت کے مسائل کا سامنا تھا جس کے باعث انہیں چلنے پھرنے اور کھڑے ہونے میں مشکل پیش آتی تھی۔

واضح رہے کہ ملکہ برطانیہ کے انتقال کے بعد شہزادہ چارلس، بادشاہ چارلس بن گئے اور ڈچز آف کارنوال کامیلا کو ملکہ کا درجہ مل گیا۔