پاکستان کے مشہور گلوکار و اداکار عاطف اسلم کو نہ صرف پاکستان میں شہرت ملی بلکہ پوری دنیا ان کے گانوں اور آواز کی دیوانی ہے یہی وجہ ہے کہ وہ شہرت کی بلندیوں پر پہنچے۔

پاکستان شوبز انڈسٹری سے تعلق رکھنے والےشمعون عباسی 20 سال سے زیادہ عرصے سے معروف اداکار، ہدایت کار اور پروڈیوسر ہیں،اداکاری میں قدم رکھنے سے پہلے وہ ایک ہدایت کار اور پروڈیوسر تھے جنہوں نے کئی بڑے ناموں کو منظرعام پر لانے میں بڑا کردار ادا کیا۔

بول انٹرٹینمنٹ کے پروگرام ’دی انسٹا شو‘ میں متھیرا کو دیے گئے ایک حالیہ انٹرویو میں متھیرا نے کہا کہ عاطف اسلم کے اتنے کامیاب ہونے کی وجہ شمعون عباسی ہیں۔

متھیرا نے شمعون عباس سے پوچھا کہ جب کوئی آپ کی وجہ سے مشہور ہو جاتا ہے تو آپ کریڈٹ کیوں نہیں لیتے؟ جس پر اداکار نے کہا کہ میں ایک ہدایت کار ہوں اور باصلاحیت لوگوں کو تلاش کرنا میرا کام ہے۔

 انہوں نے کہا کہ لوگ مجھے کنگ میکر کہتے ہیں، یہ نسل مجھے ایک اداکار کے طور پر جانتی ہے لیکن میں ایک ہدایت کار ہوں اور  ٹیلنٹ تلاش کرنا میرا کام تھا۔

شمعون عباسی نے کہا کہ میں عاطف اسلم کو جانتا تھا، اس وقت عاطف اور ان کے دوست گوہر اپنے گانے ’عادت‘ اور اپنے بینڈ کے نام جل پر لڑتے تھے، میں نے عاطف اسلم  سے کہا کہ بینڈ سے الگ ہو جاؤ اور اپنا میوزک بنانا شروع کرو، پھر اس نے ’لمحے‘ گانے کو پروڈیوس کیا، جسے میں نے سنا اور میں حیران ہوگیا ، میں نے سوچا کہ یہ گانا کسی انڈین فلم کا ہوگا اور پھر ہم نے مہیش بھٹ سے رابطہ کیا اور انہیں اس گانے کی سی ڈی دی۔

شمعون عباسی نے مزید کہا کہ اس کے بعد عاطف اسلم کی کامیابیوں کا سلسلہ شروع ہوگیا۔