ڈرامہ نویس خلیل الرحمان قمر نے معروف اداکارہ ماہرہ خان سے متعلق نیا انکشاف کیا ہے۔

خلیل الرحمان نے ایک انٹریو کے دوران ماہرہ خان کے بارے میں بات کرتے ہوئے کہا کہ ہوسکتا ہے ، میں اب ماہرہ کو معاف کردوں۔

انہوں نے کہا کہ میں کچھ دنوں میں ماہرہ کو معاف کرنے والا ہوں، اس نے میرے بہت ہی خاص ڈرامے میں کام کیا ہے جو میری زندگی پر مبنی تھا اور میں ان کی عزت کرتا ہوں۔

خلیل الرحمان قمر نے کہا کہ اس سے غلطی یہ ہوئی کہ جب ماروی سرمد کا واقعہ ہوا تو اس نے اپنے حق میں ٹوئٹ کیا اور میرے خلاف بولا، اسی لیے سزا کے طور پر میں نے اسے میرے پاس تم ہو اور لندن نہیں جاؤں گا میں کاسٹ نہیں کیا، ورنہ میں اسے کسی پروجیکٹ میں کاسٹ کر دیتا۔

اس سے قبل ریما خان اور خلیل الرحمان قمر نے ایک ساتھ انٹرویو دیا تھا جہاں میزبان نے اداکارہ سے خلیل الرحمان قمر کے بارے میں کچھ سوالات کیے۔

ریما خان نے خلیل الرحمان قمر کے تنازعات کے بارے میں اپنی رائے کا اظہار کرتے ہوئے کہا تھا کہ لمبا دھاگہ اور لمبی زبان ہمیشہ الجھ جاتے ہیں اس لیے دھاگا لپیٹ کر اور زبان سمیٹ کر رکھنی چاہئیے، اگر ان کی زبان سمیٹ کر رکھ دی گئی تو پھر جو خزانے ان کے قلم سے نکلتے ہیں وہ اس انداز سے ہم تک نہیں پہنچیں گے جیسا ہم دیکھنا چاہتے ہیں۔

انہوں نے کہا کہ میں نے ان کے ساتھ کام کیا ہے اور ان کے ڈائیلاگ بھی بولے ہیں، خلیل الرحمان قمر کی سب سے اچھی بات یہ ہے کہ لکھتے بہت اچھا ہیں اور بری بات یہ ہے کہ بہت پرفیکشنسٹ ہیں کیونکہ جب تک مطمئن نہیں ہوتے دوسرے کو قبر تک پہنچا دیتے ہیں۔

 اداکارہ نے کہا کہ وہ کام دل سے کرتے ہیں اور بہت اچھا کرتے ہیں لیکن کبھی کبھی ان کے لہجے میں تھوڑا غصہ آجاتا ہے اسے نظر انداز کردینا چاہئیے۔

ریما خان نے کہا کہ ہماری بھی لڑائیاں ہوتی ہیں لیکن  درمیان میں ایک احترام رہتا ہے اور اس سے میری دل آزاری نہیں ہوتی۔

انہوں نے کہا کہ میں خلیل صاحب کو بھی ان لوگوں میں شمار کروں گی جن سے مجھے سیکھنے کا موقع ملا،علم ایک ایسی طاقت ہے کہ جتنا آپ حاصل کرتے ہیں اتنا ہی آپ کو اپنے جاہل ہونے کا اندازہ ہوتا ہے۔

اداکارہ کا کہنا تھا کہ میں چار سال سے انتظار کر رہی ہوں کہ یہ ہی اسکرپٹ لکھیں گے تبھی فلم کروں گی۔

میزبان کی جانب سے سوال کیا گیا کہ آج کل جو خواتین خلیل صاحب کے بارے میں منفی ریمارکس دے رہی ہیں، آپ کیا کہیں گی اس بارے میں؟

انہوں نے کہا کہ کچھ تو لوگ کہیں گے لوگوں کا کام ہے کہنا ، انہوں نے کہا کہ ان میں بہت برائیاں ہیں اور کبھی کڑواہٹ بھی آجاتی ہے لیکن ان سب پر جو چیز بھاری ہے وہ یہ کہ  خلیل صاحب اپنے قلم سے وفادار ہیں۔

آخر میں ریما خان نے کہا کہ بہت ساری دعائیں ہیں میری خلیل الرحمان قمر صاحب کے لیے۔