پاکستان شوبز کے نامور اداکار حمزہ علی عباسی نے فلموں کے مقابلے میں پاکستانی ڈراموں کو ’بہتر آپشن‘ قرار دے دیا۔

غیر ملکی نشریاتی ادارے کو انٹرویو دیتے ہوئے حمزہ علی عباسی نے انکشاف کیا کہ وہ آنے والے وقتوں میں ڈراموں میں دکھائی دیں گے۔

میزبان کی جانب سے کیے گئے سوال کے جواب میں انہوں نے ڈراموں کو فلموں کے مقابلے بہتر آپشن قرار دیتے ہوئے کہا کہ  ڈرامے اس طرح بنائے جا رہے ہیں، جس میں بطور مسلمان وہ اپنی حدود میں رہ کر کام کرسکیں گے۔

ہمایوں سعید کے ساتھ آگے فلموں میں کام کرنے کے سوال پر ان کا کہنا تھا کہ مستقبل میں ہمایوں سعید کے ساتھ ایک فلم کیا، بہت ساری فلمیں کریں گے اور ان کے ساتھ دیگر منصوبے بھی کریں گے۔

اداکار کا کہنا تھا کہ فلموں میں گلیمر کے نام پر ایسی چیزیں شامل کی جا رہی ہیں جو کہ حدود سے بہت زیادہ باہر ہیں، اس لیے ان کا فلموں کے مقابلے ڈراموں میں کام کرنے کا چانس زیادہ ہے۔

حمزہ علی عباسی نے اپنی آنے والی فلم دی لیجنڈ آف دی مولا جٹ پر بات کرتے ہوئے کہا کہ انہوں نے ’نوری نتھ‘ کا کردار بہتر انداز میں ادا کرنے کے لیے مصطفیٰ قریشی کی نقل کرنے کی کوشش کی ہے، کیوںکہ ماضی کی مولا جٹ فلم میں انہوں نے نوری نتھ کا کردار شاندار طریقے سے ادا کیا، جسے لوگ آج بھی نہیں بھلا پائے۔

واضح رہے کہ فلم ’لیجنڈ آف دی مولا جٹ‘ پاکستان شوبز کی میگا بجٹ پنجابی فلم ہے جو کہ رواں ماہ 13 اکتوبر کو سنیما گھروں کی زینت بنے گی۔