پاکستان کی مشہور اداکارہ انمول بلوچ نے اپنے کیرئیر سے متعلق اہم انکشاف کر دیا ہے۔

  حال ہی میں اداکارہ نے اپنے ایک انٹرویو میں اپنے پاکستان شوبز انڈسٹری میں قدم رکھنے سے متعلق انکشاف کیا ہے کہ وہ سوشل میڈیا سے اداکارہ بنی ہیں۔

انہوں نے کہا کہ مجھے اداکاری کا شوق تھا لیکن اداکاری کرنا نہیں آتی تھی۔

 انمول بلوچ نے کہا کہ میں نے فیس بک پر آئی ڈی بنائی اور اس پر ایکٹریس لکھ دیا، آئی ڈی پر اپنی کچھ تصاویر بھی لگا دیں۔

 اداکارہ نے کہا کہ ایک دن میرے پاس پاکستان شوبز کے ہدایتکار محسن مرزا کی جانب سے کال آئی جس میں انہوں نے کہا کہ میرا ایک پروجیکٹ چل رہا ہے اور اس میں مجھے ایک کردار کو نبھانے کیلئے ایکٹریس کی ضرورت ہے، مجھے لگتا ہے کہ آپ وہ کردار نبھا لیں گی۔

  انمول بلوچ نے کہا کہ پہلے میں سمجھی کہ کوئی مذاق کر رہا ہے، پھر میں نے انکی پروفائل دیکھی، انہوں نے کافی پروجیکٹ کیے ہوئے تھے۔

اداکارہ نے کہا کہ کال کے بعد میں نے امی سے پوچھا تو انہوں نے انکار کر دیا لیکن میں نے انکی مخالفت کی اور پھر محسن مرزا سے رابطہ کیا اور پوچھا کہ کہاں آنا ہے جس پر انہوں نے کہا کہ گھر آجائیں۔

انمول بلوچ نے کہا کہ محسن مرزا کی یہ بات سن کر میں تھوڑا گھبرا گئی تھی لیکن جب میں نے انسے مزید سوالات کیے تو انہوں نے مجھے سمجھایا کہ بیٹا میرے گھر میں شوٹ بھی ہوتا ہے اور آگے جو پروجیکٹ کر رہا ہوتا ہوں اس کی سکرپٹ ریڈنگ بھی ہوتی ہے آپ یہاں آ جاؤ۔

انہوں نے کہا کہ محسن مرزا سے بات کرنے کے بعد میں انکے گھر اپنی والدہ کے ساتھ گئی تھی اور وہیں سے میرا یہ سفر شروع ہوا۔