سابق شوہر جانی ڈیپ سے ہتک عزت کیس ہارنے والی معروف اداکارہ  ایمبر ہرڈ کی حمایت میں خواتین کے حقوق سے متعلق امریکی این جی او سمیت دیگر گروپس بھی سامنے آگئے۔

دی نیویارک نیوز کے مطابق اداکارہ ایمبر ہرڈ کی حمایت میں خاتون امریکی صحافی گلوریا میری نے ایک کھلا خط شائع کیا جس پر خواتین کے حقوق سے متعلق کام کرنے والے گروپس اور دیگر کے 130 دستخط ہیں۔

اس خط میں ایمبر ہرڈ کو کیس کا ٹرائل شروع ہوتے ہی ہراسگی کا سامنا کرنے کی مذمت کرتے ہوئے کہا گیا ہے کہ غلط معلومات کی وجہ سے ایمبر ہرڈ کو ہراساں کیے جانے میں شدت آئی تھی۔

خط میں کہا گیا کہ سوشل میڈیا پر تفریح کے لیے ایک خاتون کے گھریلو اور جنسی تشدد کے الزامات کا مذاق اڑایا گیا، وہی معلومات اور اقدامات اب دوسروں کے خلاف بھی استعمال کیے جارہے ہیں۔

واضح رہے کہ رواں سال امریکی عدالت نے جانی ڈیپ کی جانب سے دائرہ کردہ ہتک عزت کیس کا فیصلہ سناتے ہوئے ایمبر ہرڈ کو سابق شوہر کو ایک کروڑ 35 لاکھ ڈالر کا ہرجانہ ادا کرنے کا حکم دیا تھا جبکہ جانی ڈیپ نے سابق اہلیہ کے خلاف 5 کروڑ ہرجانے کا دعویٰ دائر کیا تھا۔

عدالت نے ایمبر ہرڈ کی جانب سے دائرہ کردہ 10 کروڑ ہرجانے کے دعوے میں جانی ڈیپ کو بھی 20 لاکھ ڈالر ہرجانہ ادا کرنے کا حکم دیا تھا۔

ہالی ووڈ اداکارہ ایمبر ہرڈ اور جانی ڈیپ کے درمیان 2017ء میں طلاق ہوگئی تھی۔