بالی ووڈ کی معروف اداکارہ جیکولین فرنینڈس کو منی لانڈرنگ کے کیس میں گرفتار نہ کرنے پر دہلی کی عدالت نے شدید برہمی کا اظہار کیا ہے۔

بھارتی میڈیا کی رپورٹ کے مطابق دہلی کی ایک عدالت نے اداکارہ کی ضمانت کی شدید مخالفت کی اور انفورسمنٹ ڈائریکٹریٹ کو سخت سوالات کا سامنا کرنا پڑا۔

عدالت نے تفتیشی ایجنسی سے سوال کیا کہ جیکولین فرنینڈس کو اب تک کیوں گرفتار نہیں کیا جبکہ اس کیس سے جڑے دیگر افراد اس وقت جیل میں ہیں۔

جس پر انفورسمنٹ ڈائریکٹریٹ نے بتایا کہ جیکولین فرنینڈس نے ملک سے فرار ہونے کی کوشش کی اور وہ تفتیشی افسران کے ساتھ تعاون نہیں کررہی۔

انفورسمنٹ ڈائریکٹریٹ کا کہنا تھا کہ ہم نے اپنی پوری زندگی میں 50 لاکھ روپے نقد نہیں دیکھے لیکن جیکولین نے تفریح ​​کے لیے  7.14 کروڑ روپے لوٹ لیے۔

اس سے قبل مالیاتی جرائم کی تحقیقات کرنے والی ایجنسی نے اداکارہ کو ملک چھوڑنے سے روکنے کے لیے ائر پورٹ پر ایک الرٹ بھی جاری کیا تھا۔

جیکولین اس وقت عبوری ضمانت پر ہیں، اور اس درخواست پر عدالت جمعے کو اپنا فیصلہ سنائے گی۔

یاد رہے کہ اداکارہ پر اپنے مبینہ بوائے فرینڈ اور بھتہ خور سکیش چندرا شیکھر سے مہنگے تحائف وصول کرنے کا الزام ہے۔