پاکستان کے معروف  اداکار شان شاہد کی فلم ضرار 25 نومبر کو ریلیز ہو گی۔

حال ہی میں اداکار نےبول نیوز کو دیئے گئے خصوصی انٹرویو میں اپنی نئی آنے والی فلم ضرار کے سفر اور کہانی سے متعلق دلچسپ باتیں بتائی ہیں۔

فلم کے کردار بارے گفتگو کرتے ہوئے شان شاہد کا کہنا تھا کہ ضرارایک ایسا کردار ہے جو پاکستان کے اندروانی اور بیرونی خطرات سے باخبر ہے، یہ کردار مشکلات سے نمٹتا ہے۔

انہوں نے کہا کہ فلم کا اسکپرٹ پاکستان کے موجودہ حالات سے ملتا جلتا ہے۔ یہ فلم اگر دوسال پہلے لگتی تو شاید لوگوں کو کہانی سمجھ نہ آتی۔ فلم میں مرکزی اداکارہ کرن ملک بطور صحافی نظر آئیں گی۔

 بول نیوز کے صحافی نے سوال کیا کہ سینیما میں اس وقت دی لیجنڈ آف مولا جٹ لوگ زیادہ دیکھنے آرہے ہیں۔ کیا اس سے آپ کی فلم ضرار کو فائدہ ہوگا؟

جواب میں اداکار کا کہنا تھا کہ سینیما کا رخ کرنے والے لوگ فلم اور فنکار سے رشتہ رکھتے ہیں۔ اوورسیز پاکستانی ملکی فلموں کو زیادہ بزنس دیتے ہیں۔ دی لیجنڈ آف مولا جٹ کا زیادہ بزنس بیرون ملک میں ہوا ہے۔ فلم وار جب لندن میں ریلیز ہوئی تھی تو ریکارڈ بزنس کیا۔ پاکستان میں سیاسی حالات کی وجہ سے لوگ سینیما گھروں میں کم آتے ہیں۔

صحافی نے سوال کیا کہ ضرار کتنے کروڑ کا بزنس کرے گی ؟ جس کے جواب میں اداکار نے کہا کہ فلم ضرار میں کوشش کی ہے کہ اپنی تمام صلاحیتوں کو دیکھا سکوں۔ دعا ہے ہر لحاظ سے فلم کامیاب ہو۔

انہوں نے کہا کہ ہم واحد فلم فیملی ہے جس کی تیسری نسل بھی فلم انڈسٹری میں آرہی ہے۔میرے بھائی اعجاز شاہد جو اس فلم کے پروڈیوسر بھی ہے ان کی بیٹی نتالیا بھی جلد فلموں میں نظر آئیں گی۔

بول نیوز کے صحافی نے سوال کیا کہ کیا ضرار بین الاقوامی مارکیٹ میں بھارتی فلموں کا مقابلہ کرے گی؟

 اداکار شان شاہد نے کہا کہ بھارتی فلم انڈسٹری کو سب سے بڑا چیلنچ حکومتی مداخلت ہے۔ بھارتی حکومت فلموں کے اسکرپٹ بنانے پر اثر انداز ہوتی ہے۔ بین الاقوامی مارکیٹ میں ضرار بھارتی فلموں کا مقابلہ کرے گی۔