پاکستان شوبز انڈسٹری کی نامور سپر ماڈل و اداکارہ ایمان علی نے اپنے والد عابد علی سے متعلق اہم انکشاف کیا ہے۔

حال ہی میں اداکارہ نے ایک شو میں بطور مہمان شرکت کی جس میں انہوں نے اپنے والد کے گھر میں رویے کے بارے میں بات کرتے ہوئے کہا کہ ان کو ہر وقت دیکھ کر لگتا تھا کہ وہ ایک اسٹار ہیں، ان کی شخصیت اور آواز دیکھ کر ایک ڈر بھی لگتا تھا اور بڑے سے بڑے لوگ ان کے آگے ویٹر بن جاتے تھے۔

اداکارہ نے عابد علی کے بارے میں بات کرتے ہوئے کہا کہ وہ ایک خوفناک باپ تھے، وہ مشکل سے بات کرتے تھے اور جب بھی وہ پانی لانے کا کہتے تھے تو مجھے اور میری بڑی بہن کو ڈر لگتا تھا کہ یہ کون پوچھے گا، کہ پانی ٹھنڈا چاہیئے ،گرم یا پھر نورمل ،ہمارے لیے یہ ایک کام بن جاتا تھا۔

اس سے قبل اداکارہ ایمان علی نے انکشاف کیا تھا کہ وہ اپنے شوہر سے زیادہ امیر ہیں۔

اداکارہ نے اپنی فلم ٹچ بٹن کی تشہیر کے دوران ایک انٹرویو دیا تھا جس میں انہوں نے اپنی غربت، جدوجہد اور امیر ہونے کے بارے میں انکشاف کیا تھا۔

اداکارہ ایمان نے بتایا کہ میں نے غربت دیکھی ہے،میں استعمال شدہ کپڑے پہن کر بڑی ہوئی ہوں، میں نے اپنی شادی کا خرچ خود اٹھایا، مجھے یاد نہیں کہ میں نے عید کے نئے کپڑے کبھی سلائے تھے،ان سب کے باوجود محنت جاری رکھی اور پیسے بچانے کے سمجھدار طریقے تلاش کیے۔

انہوں نے دورانِ انٹرویو انکشاف کیا کہ میں اپنے شوہر بابر سے زیادہ امیر ہوں،اور یہ ایک حقیقت ہے، میں نے اپنی کمائی ہوئی ایک ایک پائی بچائی اور پھر اسے جائیداد خریدنے میں استعمال کیا، میں نے پلاٹ اور گھر خریدے اور یہاں تک کہ بابر کو یہ چیز پسند ہے اور وہ تسلیم کرتا ہے کہ میں اس سے زیادہ امیر ہوں۔

یاد رہے کہ ایمان علی نے ماہِ میر، بول، خدا کے لیے اور کئی فلموں میں اپنی اداکاری کے جوہر دکھائے ہیں۔