’’میرا دل یہ پکارے آجا‘‘ پر ڈانس کرکے مشہور ہونے والی ٹک ٹاکر عائشہ سے شادی کے خواہشمند بھارتی اداکار فیضان انصاری نے دعویٰ کیا ہے کہ پاکستان نے ان کا ویزا مسترد کردیا۔

اداکار فیضان انصاری نے بھارتی میڈیا کو بتایا کہ میں بہت پریشان ہوں کیونکہ بدقسمتی سے پاکستان نے میرا ویزا مسترد کردیا ہے تاکہ میں وہاں نہ آسکوں اور عائشہ سے نکاح نہ کرسکوں۔

انہوں نے کہا کہ میں رُکنے والوں میں سے نہیں ہوں اور میں کسی بھی حالت میں عائشہ کو حاصل کرکے رہوں گا۔

یہ بھی پڑھیں: میرا دل یہ پکارے آجا‘ پر لڑکی نے ڈانس کیوں کیا؟

اداکار کا کہنا تھا کہ میں نے جب عائشہ کی وائرل ویڈیو پہلی بار دیکھی تو مجھے لگا کہ میری زندگی میں بس اب یہی ہیں اور انہیں مجھے کسی بھی حالت میں حاصل کرنا ہے۔

فیضان انصاری نے کہا کہ اس کے لیے میں نے پورا منصوبہ بھی بنالیا اور عائشہ کو 15 لاکھ حقِ مہر دینے کا بھی اعلان کیا ہے، جس پر مجھے تنقید کا سامنا کرنا پڑا کہ عائشہ نے تو کچھ دنوں میں خود کروڑوں روپے کمالیے ہیں تو اس حساب سے 15 لاکھ روپے کم ہیں۔

انہوں نے اس تنقید کا جواب دیتے ہوئے کہا کہ میں حق مہر 25 لاکھ روپے بھی دے سکتا ہوں مجھے پیسوں کا کوئی مسئلہ نہیں ہے، مجھے عائشہ کسی بھی حال میں چاہیے۔

یہ بھی پڑھیں؛ ’میرا دل یہ پکارے آجا‘ والی لڑکی کی ایک اور ویڈیو وائرل

واضح رہے کہ میرا دل یہ پکارے آجا سے وائرل ہونے والی پاکستانی ٹک ٹاکر عائشہ کے ڈانس کی اب تک سوشل میڈیا پر دھوم مچی ہوئی ہے۔

اس ڈانس کی ویڈیو وائرل ہونے کے بعد نئے ٹرینڈ کا آغاز ہوگیا جس میں متعدد افراد اپنی ویڈیوز پوسٹ کررہے ہیں۔

بھارت سے بھی اس ٹرینڈ پر متعدد ویڈیوز سامنے آئی ہیں، حتیٰ کہ اداکارہ کترینہ کیف اور مادھوری ڈکشٹ کو بھی اس وائرل ٹرینڈ کا حصہ بنتے دیکھا گیا۔