مودی سرکار کی جانب سے فلم پٹھان کے بائیکاٹ کے مطالبے پر بھارتی شہریوں نے آڑے ہاتھوں لے لیا ہے۔

بھارتی میڈیا کے مطابق سوشل میڈیا پر بھارتی شہری مودی سرکار سے سوال کرنے لگے ہیں کہ کیا انھیں ملک میں غربت نظر نہیں آتی؟ کیا سرکار صرف اب فلموں کو مُدا بنائے گی؟

خیال رہے کہ ریاست بہار میں شاہ رخ خان کی فلم پٹھان کے خلاف مودی سرکار کے اراکین اسمبلی کی جانب سے مقدمہ درج کیا جا چکا ہے، ایم پی ایز کی جانب سے مسلسل فلم میں کپڑوں کے رنگ پر ہنگامہ مچایا جا رہا ہے۔

مزید پڑھیں: فلم ’پٹھان‘  کیلئے شاہ رخ خان نے کتنے سال سخت ورزش کی؟

دوسری جانب حال ہی میں بھارتی ریاست بہار کے علاقے مظفر پور کی عدالت میں ایڈووکیٹ سدھیر اوجھا نامی شخص نے ایف آئی آر درج کروائی ہے جس میں شاہ رخ خان سمیت 8 فلمی شخصیات کو نامزد کیا گیا ہے۔

   ایڈووکیٹ سدھیر اوجھا کا موقف ہے کہ فلم پٹھان کا گانا ‘بے شرم رنگ’ نے فحاشی پھیلانے کے ساتھ ساتھ ہندوؤں کے جذبات کو ٹھیس پہنچائی ہے۔

انہوں نے کہا کہ اس فلم کے ٹریلر کو یو ٹیوب اور دیگر چینلز کے ذریعے ریلیز کیا گیا۔

  ایڈووکیٹ سدھیر اوجھا نے فلم پٹھان پر پابندی عائد کرنے اور فلم کے خلاف قانونی کارروائی کا مطالبہ کیا۔

بہار کی مقامی عدالت نے شکایت کنندہ کی درخواست پر مقدمہ درج کرنے کا حکم دیا ہے اور کیس کی سماعت 3 جنوری کو کرنے کا حکم جاری کردیا ہے۔

مزید پڑھیں:  شاہ رخ خان کی فلم ’پٹھان‘ میں جان ابراہم کس نئے لُک میں نظر آئینگے؟ ٹیزر جاری

واضح رہے کہ بھارتی شہر کلکتہ میں ایک فلم فیسٹیول کے دوران خطاب کرتے ہوئے شاہ رخ خان کا کہنا تھا کہ کچھ دنوں سے ہم لوگ یہاں پر نہیں آئے ہیں، آپ لوگوں سے مخاطب نہیں ہوپائے ہیں، آپ لوگوں سے مل نہیں پائے ہیں لیکن اب دنیا نارمل ہوگئی ہے۔

ان کا کہنا تھا کہ ہم سب خوش ہیں ، میں سب سے زیادہ خوش ہوں اور یہ بات بتانے میں مجھے کوئی دقت نہیں ہے کہ دنیا  کچھ بھی کرلے ، میں  اور آپ لوگ اور جتنے بھی مثبت لوگ ہیں سب کے سب ’زندہ‘ ہیں۔

فلم پٹھان میں شاہ رخ کے ہمراہ اداکارہ دیپیکا پاڈوکون اور  اداکار جان ابراہم بھی مرکزی کردار  میں نظر آئیں گے۔