جھارکنڈ سے تعلق رکھنے والی معروف بھارتی اداکارہ ریا کماری کو ڈکیتی مزاحمت پر قتل کردیا گیا ہے۔

بھارتی میڈیا کے مطابق ویسٹ بنگال کے ضلع ہاوڑہ میں افسوس ناک واقعہ پیش آیا ہے، جہاں جھارکنڈ کی اداکارہ ریا کماری کو ڈکیتی مزاحمت پر قتل کردیا گیا۔

رپورٹ کے مطابق ریا کماری اپنی دو سالہ بیٹی اور شوہر پراکاش کمار کے ہمراہ نیشنل ہائی وے سے کلکتہ جارہی تھی۔

رپورٹ میں کہا گیا ہے دوران سفر انہوں نے صبح چھ بجے کے قریب مہیش ریکھا کے علاقے میں تھوڑی دیر رکنے کا فیصلہ کیا جس دوران تین افراد نے ان پر لوٹنے کے لیے حملہ کردیا۔

اسی دوران ریا کماری نے اپنے شوہر کو بچانے کی کوشش کی تو ملزمان نے ان پر فائر کردیا جس کی وجہ سے ان کی موت ہوگئی ہے۔

بھارتی میڈیا کا کہنا ہے کہ ریا کماری کے شوہر اور فلم پروڈیوسر پراکاش کمار نے انہیں بچانے کی بہت کوشش کی لیکن کئی دور تک بھی کوئی مدد نہ مل سکی۔

بعد ازاں کچھ لوگ نظر آئے جو انہیں قریبی اسپتال ایس سی سی میڈیکل لے گئے جہاں پہنچنے سے قبل ہی ریا کماری اپنی جان کی بازی ہار بیٹھی تھیں۔

اس پورے معاملے پر پولیس کا کہنا ہے کہ ’واقعے کی تحقیقات کا آغاز کردیا گیا ہے جب کہ فرانزک کے لیے گاڑی کو بھی تحویل میں لیا گیا ہے‘۔

پولیس نے بتایا کہ ریا کماری کے شوہر سے بھی سوال و جواب کیے جارہے ہیں جب کہ جن لوگوں نے اسپتال پہنچانے میں ان کی مدد کی انہیں بھی شامل تفتیش کیا جائے گا۔