اداکارہ کیٹ ونسلیٹ نے پانی کے اندر 7 منٹ تک سانس روک کر اداکار ٹام کروز کا ریکارڈ  توڑ دیا ہے۔

حال ہی میں اداکارہ کیٹ ونسلیٹ نے اپنے ایک انٹرویو میں نئی آنے والی فلم اواتار سے متعلق ایک حیرت انگیز انکشاف کیا ہے۔

انہوں نے کہا کہ فلم کے لیے تربیتی سیشن کے دوران میں نے پانی کے اندر 7 منٹ 15 سیکنڈ تک سانس روکنے کا حیرت انگیز کارنامہ سرانجام دیا تھا۔

انٹرویو کے دوران کیٹ ونسلیٹ کی پانی کے اندر 7 منٹ 15 سیکنڈ تک سانس روکنے کی ویڈیو دکھائی گئی، جس میں سانس روکنے کی مشق کے بعد اداکارہ نے پوچھا کہ کیا میں مرگئی ہوں؟

Advertisement

New clip shows Kate Winslet after holding her breath for 7 minutes and 15 seconds. #AvatarTheWayOfWater #Ronal pic.twitter.com/1PuyC3UY15

— Avatar Sequels (@avatarsequelsbr) December 10, 2022

 جب کیٹ ونسلیٹ کو علم ہوا کہ انہوں نے کتنی دیر تک سانس روکی تو وہ پرجوش ہوگئیں۔

میزبان نے پوچھا کہ ایسا کیسے کیا تو ان کا کہنا تھا کہ ‘پہلی بات تو یہ ہے کہ یہ ایسا کام نہیں جو آپ نہاتے ہوئے کرسکیں، یہ ایسا کام نہیں جو آپ کو خود کرنا چاہیے’۔

انہوں نے کہا کہ ‘میں نے اس کے لیے 3 ہفتوں تک تربیت حاصل کی تھی اور اس عرصے میں ہر دن یہ سیکھا کہ کس طرح جسم میں آکسیجن تقسیم ہوتی ہے، یہ بہت تفصیلی اور غیرمعمولی عمل ہوتا ہے، میں نے اس میں مہارت حاصل کرلی’۔

انٹرویو کے دوران جب اداکارہ سے پوچھا کہ ٹام کروز کا 2015 کی فلم میں زیرآب 6 منٹ تک سانس روکنے کا ریکارڈ توڑ کر انہیں کیسا محسوس ہوتا ہے تو کیٹ ونسلیٹ نے کہا کہ ‘ایک خاتون کے طور پر مجھے کچھ نیا سیکھنے پر بہت اچھا محسوس ہوتا ہے’۔

واضح رہے کہ فلم اواتار کا دوسرا حصہ 16 دسمبر کو ریلیز ہوگا جس کی بیشتر کہانی سمندر پر مبنی ہے اور یہی وجہ ہے کہ کاسٹ نے اداکاری کے لیے فری ڈائیونگ کو سیکھا جبکہ سانس روکنے کی تربیت بھی حاصل کی۔