کینیڈین گلوکارہ سولین ڈیون ایک غیر معمولی اعصابی بیماری کا شکار ہوگئیں۔

حال ہی میں گلوکارہ سولین ڈیون نے سوشل میڈیا کی فوٹو اینڈ ویڈیو شئیرنگ ایپ انسٹا گرام پر ایک ویڈیو پوسٹ کی جس میں ان کا کہنا تھا کہ ڈاکٹروں نے stiff person syndrome نامی عارضے کی تشخیص کی ہے جس کا سامنا بہت کم افراد کو ہوتا ہے۔

ان کا کہنا تھا کہ اس بیماری میں مریض کو مسلز اکڑ جانے اور تکلیف دہ تشنج کا سامنا ہوتا ہے، اس بیماری کی وجوہات میں بہت تیزی سے حرکت، سرد درجہ حرارت یا بہت زیادہ بلند آواز قابلِ ذکر ہیں۔

گلوکارہ نے بتایا کہ جیسا آپ جانتے ہیں کہ میں ہمیشہ ایک کھُلی کتاب کی طرح رہی ہوں، میں پہلے یہ کہنے کے لیے تیار نہیں تھی مگر اب تیار ہوں۔

انہوں نے کہا کہ میں طویل عرصے سے طبی مسائل کا مقابلہ کر رہی تھی اور اب میرے لیے ان مسائل کا سامنا کرنا بہت مشکل ہوگیا ہے۔

سولین ڈیون کا کہنا تھا کہ وہ اور ان کی ٹیم اس بیماری کو بہتر طریقے سے سمجھنے کے لیے کام کر رہی ہے، اس سے متاثر ہونے کا امکان ہر 10 لاکھ میں سے ایک فرد میں ہوتا ہے۔

گلوکارہ نے بتایا کہ بدقسمتی سے تشنج سے میری روز مرہ کی زندگی کا ہر پہلو متاثر ہوا، کئی بار چلنے کے دوران مشکلات کا سامنا ہوتا ہے۔

سولین ڈیون کا مزید کہنا تھا کہ اس کے باعث میں اس طرح گلوکاری نہیں کرسکتی جیسے کرتی تھی، مجھے آپ کو بتاتے ہوئے تکلیف ہو رہی ہے کہ میں فروری میں یورپ کے ٹور کے لیے تیار نہیں۔