معروف ڈرامہ نگار، اداکار، شاعر افتخار احمد اِفی کی کتاب “چکر چھولے” کی شاندار رونمائی نوشین آرٹ سینٹر میں کی گئی۔

پاکستان جرنلسٹس فورم اور پرائم آرکیڈ کے تعاون منعقدہ نمائش میں پاکستانی کمیونٹی خواتین و حضرات کی بڑی تعداد نے شرکت کی۔

مہمان خصوصی افتخار اِفی نے منتظمین کا شکریہ ادا کرتے ہوئے کہا کہ میرا کام اپنی شاعری کو میڈیا کے ذریعے پوری دنیا میں بسنے والے خاص طور پر پاکستانی تارکین وطن کو ایک دوسرے سے رواداری اور محبت کا پیغام دینا ہے جو اللہ تعالی نے حکم کیا جبکہ ہم دنیا کے معاملات میں دولت، رتبے کے چکر میں پڑ کر اپنے رشتے بھلا بیٹھے ہیں۔

انہوں نے کہا کہ میں اپنا پیغام اپنی شاعری میں دینا چاہتا ہوں کہ دوسروں کی غلطیوں کو درگزر کر کے بہتر کرنے کی کوشش کریں۔

سعودی انٹرٹینمنٹ اتھارٹی کی مشیر اور تقریب کی روح رواں نوشین وسیم نے افتخار اِفی کی کتاب کی رونمائی کی اور بڑی تعداد میں موجود مہمانوں کا شکریہ ادا کیا۔

ان کا کہنا تھا کہ پی جے ایف ایک قدیم صحافتی تنظیم ہے جو اپنی پیشہ ورانہ خدمات احسن طریقے سے انجام دے رہے ہیں۔

عشائیہ میں کتاب کے حوالے سے خصوصی طور پر چکر چھولے رکھے گئے جبکہ افتخار اِفی نے حاضرین کو اپنی شاندار شاعری سنا کر داد حاصل کی۔

افتخار اِفی کا کہنا تھا کہ سعودی سرزمین تو محبتوں اور تاریخی حوالوں سے بھی محبتوں کی سرزمین ہے جہاں ہمارے پیارے نبی محمد ﷺ نے محبتوں کادرس دیا۔

اس پہلے جب وہ تقریب میں پہنچے تو بڑی گرمجوشی سے انکا استقبال کیا گیا اور سعودی انٹرٹینمنٹ اتھارٹی کی مشیر نے حاضرین کی طرف سے پھولوں کا گلدستہ پیش کیا۔