بالی ووڈ کی مشہور اداکارہ جھانوی کپور ہر طرح کے کرداروں میں جان ڈال دیتی ہیں۔ اپنی اداکاری اور ذاتی زندگی کو لے کر اداکارہ اکثر سوشل میڈیا پر چھائی رہتی ہیں۔

جھانوی کپور سوشل میڈیا پر کافی متحرک رہتی ہیں اور ان کے مداحوں کو ان کی ہر پوسٹ کا بڑی بے صبری سے انتظار رہتا ہے، یہی وج ہے کہ ان کی ہر پوسٹ سامنے آتے ہی وائرل ہوجاتی ہے۔

جھانوی کپور کے مداح انہیں کافی پیار کرتے ہیں، لیکن کچھ لوگ ایسے ہیں جو اداکارہ پر تنقید بھی کرتے رہتے ہیں۔

اس طرح کے لوگوں سے پریشان ہوکر اب جھانوی کپور نے اپنا درد بیان کیا ہے اور ساتھ ہی تنقید کرنے والوں کو آڑے ہاتھوں لیا۔

تاہم اداکارہ کو ان دنوں سوشل میڈیا پر ٹرول بھی کیا جارہا ہے، جو اداکارہ کو بالکل پسند نہیں آیا اور انہوں نے اپنے کام اور اداکاری پر اپنے دل کی بات کہی ہے۔

جھانوی کپور نے حال ہی میں ایک انٹرویو میں ٹرولنگ پر اپنی رائے پیش کرتے ہوئے کہا کہ لوگ جس طرح کی باتیں کررہے ہیں، انہیں دیکھ کر بہت دکھ ہوتا ہے۔

انہوں نے کہا کہ ایک اداکار اپنے کام پر پوری توجہ مرکوز رکھتا ہے اور اس کیلئے سخت محنت بھی کرتا ہے، لیکن لوگ کچھ سوچے سمجھے بغیر اتنی آسانی سے کہہ دیتے ہیں کہ اداکاری نہیں آتی تو کرتی کیوں ہو؟

یہ بھی پڑھیں: جھانوی کپور پاکستانی ڈیزائنر کی پرستار ہوگئیں

بھارتی اداکارہ نے تنقید کرنے والے لوگوں کے بارے میں کہا کہ کچھ لوگ ایسے ہوتے ہیں کہ آپ خواہ جتنی مرضی اچھا کام کرلیں، لوگ آپ کے اندر خامیاں نکال ہی لیتے ہیں۔

انہوں نے کہا کہ یہ دیکھ کر کبھی کبھی بہت برا اور کبھی بہت غصہ آتا ہے، کیونکہ ہم اتنا خون پسینہ بہاتے ہیں لیکن لوگ آکر آسانی سے کہہ دیتے ہیں کہ اس کو اداکاری نہیں آتی۔

انہوں نے مزید کہا کہ وہ اپنے کام کو پورے دل سے کرتی ہیں۔ اپنے ہر کردار کیلئے سخت محنت کرتی ہیں، لیکن لوگ کچھ دیکھے بغیر ہی ہر چیز کا مذاق بناتے ہیں ، یہ سب دیکھ کر دل بہت پریشان ہوجاتا ہے۔

انٹرویو کے دوران جھانوی کپور نے یہ بھی کہا کہ جو لوگ آپ کیلئے اچھا نہیں سوچ سکتے، وہ آپ کی ہر چیز کو چھیننا ضرور چاہیں گے۔