لندن میں مقیم پاکستانی گلوکار چاہت فتح علی خان پی ایس ایل 8  کےلئے گانا گانے کے بعد سوشل میڈیا صارفین کی کافی حد تک توجہ حاصل کرنے میں کامیاب ہو گئے۔

اپنے ایک حالیہ انٹرویو میں چاہت فتح علی خان کا کہنا تھا کہ اللہ کا کرم ہے، گزشتہ 6 ماہ میں ریلیز کیے جانے والے 6 میں سے 3 گانے سُپرہٹ رہے، خصوصاً ’یہ جو پیارا پی ایس ایل‘ ہے تو سوشل میڈیا پر لاکھوں بار سُنا جاچکا ہے۔

اپنے کیریئرکے حوالے سے بتاتے ہوئے انہوں نے کہا کہ گلوکاری کا شوق 1982 یا 1983 سے ہے جب انہوں نے شیخوپورہ میں ایک میوزک گروپ میں شمولیت اختیار کی تھی۔

انہیں نصرت فتح علی خان نے براہ راست گانا نہیں سکھایا تھا لیکن وہ انہیں اپنا روحانی استاد مانتے ہیں۔

ان کا کہنا تھا کہ ”میں جانتا تھا کہ میں ایک بہترین اداکار، پرفارمر، ماڈل اور گلوکار ہوں لہذا میں نے اپنے ٹیلنٹ کو اسکرین پر لانے کا فیصلہ کیا“۔

پی ایس ایل 8 کے ترانے پر تبصرہ کرتے ہوئے گلوکار نے انکشاف کیا کہ پاکستان کرکٹ بورڈ کے چیئرمین نجم سیٹھی کے سیکریٹری نے ان سے تین بار رابطہ کیا یہاں تک کہ پی سی بی کے سربراہ نے بھی ان کے ٹوئٹراکاؤنٹ کا جائزہ لیا۔

دیکھنے والوں کو اپنا اصل نام بتا کرحیران کرنے والے گلوکار نے مزید کہا کہ ، ”میرا اصل نام کاشف رانا ہے، تقریباً 7 سال قبل جب میں نے دوبارہ گانا شروع کیا تو اسے تبدیل کرلیا“۔

چاہت علی خان کا دعویٰ ہے کہ انہوں نے پاکستان اور دیگر ممالک میں موسیقی کے بہت سے پروگراموں میں پرفارم کیا۔

انہوں نے یہ بھی دعویٰ کیا کہ وہ موسیقی کے تمام فارمیٹس میں گانے کے ماہر ہیں لیکن انہیں قوالی گانا سب سے زیادہ پسند ہے۔