بالی ووڈ کے معروف پروڈیوسر اور ڈائریکٹر مہیش بھٹ کا کہنا ہے کہ بیٹی کی پیدائش کے بعد خود کو ایک بہتر آدمی بنایا۔

حال ہی میں بالی ووڈ کے معروف پروڈیوسر اور ڈائریکٹر مہیش بھٹ نے معروف اداکار ارباز خان کو انٹرویو دیتے ہوئے کہا کہ ایک بار وہ نشے میں اس قدر دھت تھے کہ انہوں نے رات فٹ پاتھ پر گزاری۔

انہوں نے کہا کہ جب میں جاگا تو دیکھا کہ فٹ پاتھ پر سو رہا تھا، مجے یاد ہے کہ میں اوندھے منہ پڑا ہوا تھا اور صبح ہونے والی تھی، مجھے یاد آیا کہ میں کسی دعوت میں گیا تھا اور نشے کی حالت میں واپسی پر یہاں گر کر سوگیا تھا۔

یہ بھی پڑھیں؛ مہیش بھٹ اداکار رنبیر کو گلے لگا کر جذباتی ہوگئے

مہیش بھٹ کے انکشاف پر ارباز خان نے کہا کہ آپ اتنے زیادہ مخمور تھے کہ میں نے اور سلمان خان نے آپ کو ٹیکسی میں گھر لے جانے کی کوشش کی تھی مگر آپ بھول گئے تھے کہ آپ رہتے کہاں ہیں۔

ارباز خان نے کہا کہ ہمیں بہت شرمندگی ہو رہی تھی کہ ہم بھی آپ کی رہائشگاہ سے لاعلم ہیں لیکن ہمیں ہنسی بھی آ رہی تھی، لیکن اس واقعے کے بعد آپ نے ایک دم 360 ڈگری زاویے سے خود کو تبدیل کیا۔

مہیش بھٹ نے کہا کہ پھر ایک واقع نے میری زندگی بدل دی، جب میری بیٹی شاہین پیدا ہوئی تو میں اسپتال گیا اور اس کو اپنی گود میں لے کر چومنے کی کوشش کی تو اس نے خود کو مجھ سے دور کرنے کی کوشش کی کیونکہ وہ شراب کی بُو برداشت نہیں کر پا رہی تھی۔

  فلمساز مہیش بھٹ نے کہا کہ وہ تو بچی تھی، اسے کیا معلوم، لیکن میں نے خود سے یہ سب اخذ کیا اور خود کو بہتر آدمی بنایا۔