معروف پاکستانی اداکارہ صحیفہ جبار سے متعلق افسوسناک خبر آگئی ہے۔

حال ہی میں اداکارہ نے اپنے انسٹاگرام اکاؤنٹ پر اسٹوری پوسٹ کی ہے جس میں انہوں نے اپنے مداحوں کے ساتھ اپنی پریشان کُن سوچیں، ذہنی دباؤ، مرنے کی تمنا کرنے اور اس کڑے وقت میں شوہر کی جانب سے بھرپور ساتھ دیئے جانے سے متعلق بات کی ہے۔

انہوں نے لکھا کہ وہ گزشتہ 60 دنوں سے پرسکون نیند نہیں  سو پائیں، وہ بہت مایوس اور اداس ہیں اور وہ گزشتہ 2ماہ سے ہر روز اپنی موت کی تمنا کر رہی ہیں۔

صحیفہ جبار نے لکھا ہے کہ اُنہیں اپنی موجودہ حالت کو سمجھنے اور اسے قبول کرنے میں مشکلات کا سامنا ہے، وہ بہت ہی غمگین، مسائل سے دوچار، بے سکون اور مایوس ہیں۔

اداکارہ نے لکھا ہے کہ اُنہیں سمجھ نہیں آ رہا کہ ان کے ساتھ کیا اور کیوں ہو رہا ہے، وہ  سو نہیں پا رہی ہیں، ان کا وزن 12 کلو تک کم ہو گیا ہے اور اِن کے اہل خانہ اِنہیں پریشان دیکھ کر غمگین اور پریشان رہتے ہیں۔

صحیفہ جبار نے لکھا ہے کہ دراصل ان کی اپنی ہی ذات سے لڑائی ہے، وہ اپنی وجہ سے ہی تکلیف کا شکار ہیں اور انہیں اس تکلیف سے اور کوئی نہیں نکال سکتا، اِنہیں خود ہی اپنا درد برداشت کرنا ہے اور اس صورتحال سے باہر نکلنا ہے۔

انہوں نے لکھا ہے کہ لوگ سمجھتے ہیں کہ میرے پاس عیاشی کی ہر چیز موجود ہے، میں ایسے افراد کو بتانا چاہتی ہوں کہ دولت اور عیاشی کی ہر چیز آپ کو سکون نہیں دلا سکتی، میں یہ انسٹاگرام اسٹوریز متحدہ عرب امارات (یو اے ای) کی ریاست دبئی کے ایک پرتعیش ہوٹل کے آرام دہ بستر پر لیٹ کر لکھ رہی ہوں لیکن میں بے سکون ہوں، میں تکلیف میں ہوں۔

ماڈل صحیفہ نے لکھا ہے کہ میرے گھر والے میری اس حالت سے پریشان ہیں، مگر اُنہیں یقین ہے کہ میں اس صورتحال سے ضرور نکلوں گی اور صحت یاب ہو جاؤں گی۔

آخر میں اداکارہ نے اپنے شوہر کی تعریف اور ہر اچھے برے وقت میں ساتھ دینے پر اُن کا شکریہ بھی ادا کیا ہے۔