بالی ووڈ کی اُبھرتی ہوئی سُپر اسٹار عالیہ بھٹ نے ایک مرتبہ پھر مداحوں کا دل جیت لیا۔

عالیہ بھٹ کا نام ایک مرتبہ پھر ٹاپ ٹرینڈز میں شامل ہے تاہم اس مرتبہ اس کی وجہ ان کی کوئی فلم نہیں بلکہ ان کا اخلاق ہے۔ سوشل میڈیا پر عالیہ بھٹ کی ایک ویڈیو وائرل ہو رہی ہے جس میں انہیں ایک فوٹوگرافر کا فٹ پاتھ پر پڑا جوتا اُٹھائے دیکھا جا سکتا ہے۔

دراصل ہوا کچھ یوں کہ اداکارہ اپنے گھر والوں کے ہمراہ ڈنر کر کے ریسٹورنٹ سے باہر نکلیں کہ پاپارازی ان کی تصاویر لینے کیلئے وہاں جمع ہوگئے اسی دوران ایک فوٹوگرافر کا جوتا فٹ پاتھ پر رہ گیا۔

اداکارہ نے مسکراتے ہوئے فوٹوگرافر کیلئے تصاویر بنوائیں اسی دوران ان کی نظر جوتے پر پڑی۔ عالیہ نے خوش اخلاقی کا مظاہرہ کرتے ہوئے خود نیچے پڑا جوتا اُٹھایا اور فوٹوگرافر کو اس کا جوتا واپس لوٹانے اس کے قریب پہنچ گئیں۔

فوٹوگرافر اداکارہ کو جوتا اُٹھانے سے روکتے رہے تاہم اداکارہ نے ہچکچاہٹ محسوس کیے بغیر جوتا اُٹھا لیا اور ایک مرتبہ پھر ثابت کر دیا کہ انہیں سُپر اسٹار ہونے کا کوئی غرور نہیں۔

سوشل میڈیا پر عالیہ بھٹ کی یہ ویڈیو خوب وائرل ہورہی ہے اور مداح اداکارہ کے اس عمل پر ان کی خوب تعریف کر رہے ہیں۔

ایک مداح نے ویڈیو پر تبصرہ کرتے ہوئے لکھا کہ ’عالیہ ایک ہی دل ہے کتنی مرتبہ جیتو گی‘۔ ایک صارف کا کہنا تھا کہ عالیہ ہمیشہ یہ ثابت کر دیتی ہیں کہ وہی اصلی سُپر اسٹار ہیں۔

یاد رہے کہ عالیہ بھٹ جلد رنویر سنگھ کے ساتھ اپنی نئی فلم راکی اور رانی کی پریم کہانی میں جلوہ گر ہوں گی۔