بالی ووڈ کے مشہور و معروف اداکار عامر خان نے شاہ رخ خان سے متعلق حیران کُن انکشاف کردیا ہے۔

بھارتی میڈیا رپورٹس کے مطابق اداکار عامر خان نے حال ہی میں ٹیکنالوجی اور لیڈر شپ سمٹ میں شرکت کی۔

اس موقع پر اداکار عامر خان کا کہنا تھا کہ وہ ٹیکنالوجی سے اتنا لگاؤ نہیں رکھتے تھے لیکن شاہ رخ خان انہیں ٹیکنا لوجی کی طرف لے کر آئے، میرا ٹیکنالوجی سے دور دور تک کوئی تعلق نہیں تھا۔

انہوں نے بتایا کہ 1996 میں شاہ رخ خان اور میں امریکا اور برطانیہ میں ٹیکنالوجی پر ایک شو کر رہے تھے اور اس وقت شاہ رخ خان ٹیکنالوجی سے بہت واقف رہتے تھے، ایک کمپنی نے اس وقت ایک نیا لیپ ٹاپ نکالا جس پر شاہ رخ خان نے انہیں لیپ ٹاپ لینے کا مشورہ دیا۔

ان کا کہنا تھا کہ میں نے شاہ رخ خان سے کہا کہ میں نے اپنی زندگی میں کبھی کمپیوٹر استعمال نہیں کیا مجھے کیا ضرورت ہے کمپیوٹر کی؟ تو اس پر شاہ رخ خان نے کہا کہ تو سمجھ نہیں رہا، اس میں تو دفتر کی چیزیں ڈال، یہ ڈال وہ ڈال اور مجھے بہت سمجھایا تو میں نے کہا جو تو لے گا اپنے لیے وہی میرے لیے لے لینا۔

عامر خان نے کہا کہ شاہ رخ خان نے انہیں لیپ ٹاپ دیا جو انہوں نے پانچ سال تک استعمال ہی نہیں کیا اور جب پانچ سال بعد میں نے ایک نیا منیجر رکھا تو وہ بولا سر میں نے آپ کا ایک لیپ ٹاپ دیکھا ہے، وہ پڑا رہتا ہے کیا میں اسے استعمال کرسکتا ہوں؟ جس پر میں نے ہامی بھری اور کہا پلیز اسے استعمال کرو۔

معروف اداکار عامر خان نے مزید بتایا کہ جب منیجر نے لیپ ٹاپ آن کیا تو وہ آن ہی نہیں ہوا۔