پاکستان کی معروف اداکارہ ریشم کی جانب سے معروف اداکارہ و ہدایتکارہ سکینہ سمو کو منافق کہنے کی وجہ سامنے آگئی ہے۔

حال ہی میں پاکستان کی معروف اداکارہ ریشم نے ایک نجی ٹی وی چینل کے شو میں شرکت کی جہاں میزبان نے ان سے ہدایتکارہ سکینہ سمو سے متعلق سوال کیا۔

سوال کے جواب میں اداکارہ ریشم کا کہنا تھا کہ میں ان کے بارے میں بات نہیں کرنا چاہتی، ایسے لوگ منافق ہوتے ہیں، اللہ معاف کرے، میں نے ان کے بارے میں کبھی کچھ نہیں کہا لیکن جب مجھے میرے کام کا صلہ دیا گیا اور اعزاز سے نوازا گیا تو انہیں بہت تکلیف ہوئی۔

انہوں نے کہا کہ جب مجھے اور علی ظفر کو پرائیڈ آف پرفارمنس کے اعزاز سے نوازا گیا تو وہ برداشت نہ کرسکیں اور ہم دونوں کے پیچھے ہی پڑ گئیں۔

ریشم نے کہا کہ انہوں نے سکینہ سمو کے ساتھ ایک ڈرامے ’معافی‘ میں کام کیا، وہ اچھی ہدایت کارہ ہیں اور انہوں نے اس وقت میری بہت تعریف بھی کی اور منافقت دیکھیں جب اعزاز دیا گیا تو انہیں بُرا لگ گیا، وہ یہ بات مجھے کال کرکے بھی کہہ سکتی تھی لیکن انہوں نے میڈیا پر کہا۔ مجھے نہیں معلوم کہ وہ میرے ایوارڈ سے اتنی ناراض کیوں ہوئیں، میں نے بہت لگن سے کام کیا ہے اور اپنے ساتھیوں کو عزت دی ہے۔

اداکارہ نے کہا کہ آپ میرے ساتھیوں سے بھی پوچھ سکتے ہیں کہ ریشم کیسی شخصیت ہے؟ ہر کوئی آپ کو میری محنت اور ایمانداری کے بارے میں بتائے گا، آپ (سکینہ سمو) کون ہوتی ہیں یہ کہنے والی کہ مجھے بلاوجہ ایوارڈ دیا گیا یا میں حق دار نہیں تھی۔

یاد رہے کہ 2021 میں مایاناز اداکارہ ریشم کو فلم اور ٹیلی ویژن کے لیے ان کی خدمات پر صدارتی ایوارڈ سے نوازا گیا تھا، جس پر سینئر اداکارہ و ہدایتکارہ سکینہ سمو نے اعتراض کرتے ہوئے کہا تھا کہ علی ظفر اور ریشم اس ایوارڈ کے حقدار نہیں ہیں۔