پاکستان شوبز انڈسٹری کی معروف ماڈل، میزبان و اداکارہ نتاشا حسین نے اداکار شہروز سبزواری سے متعلق متنازع بیان پر معافی مانگ لی ہے۔

حال ہی میں اداکارہ نتاشا حسین نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر اسٹوری کے ذریعے ایک بیان جاری کیا ہے۔

اداکارہ نتاشا حسین نے معذرت کرتے ہوئے اپنی اسٹوری میں لکھا کہ میں اپنے دیے گئے بیان پر معذرت خواہ ہوں، میں نے ایسا کہا تھا مگر میرا یہ ہر گز مطلب نہیں تھا۔

انہوں نے کہا کہ شہروز سبزواری اچھے اداکار ہیں، ان کے بارے میں جو کہا غلط تھا، پاکستان اس وقت بُرے حالات سے گزر رہا ہے مگر پھر بھی لوگوں کے پاس اتنا فضول وقت ہے کہ لوگ ہر بات کو بڑھا چڑھا کر پیش کرتے ہیں۔

ان کا کہنا تھا کہ لوگوں کو اپنی زندگی پر توجہ دینی چاہیے، کمال ہے کہ بات پکڑنے کا فن لوگوں کی تفریح بن چکا ہے۔

اداکارہ نتاشا حسین نے ایک بار پھر سے اپنی اسٹوری میں معافی مانگتے ہوئے لکھا کہ متعلقہ شخص سے معذرت اور اُن لوگوں پر افسوس ہے جنہوں نے اس بات کو اپنے لیے فکر کا لمحہ بنا لیا ہے۔

واضح رہے کہ اپنے دیے گئے ایک انٹرویو میں اداکارہ نتاشا حسین نے کہا تھا کہ سینئر اداکار بہروز سبزواری کے بیٹے شہروز سبز واری اچھے اداکار نہیں ہیں۔

ان کا کہنا تھا کہ شہروز سبزواری کو شوبز انڈسٹری میں کام صرف اپنے والد کی وجہ سے ملا ہے تاہم ان کے والد بہروز سبزواری بہترین اداکار ہے۔

اسی طرح انہوں نے ایک اور سوال کے جواب میں آمنہ حق کو بہترین ماڈل اور بُری اداکارہ قرار دیا تھا جبکہ سونیا امام کے بارے میں بات کرتے ہوئے کہا تھا کہ انہیں ماڈل نہیں سمجھتی۔

اس بیان کے بعد سوشل میڈیا صارفین کی جانب سے اداکارہ پر کڑی تنقید کی جارہی تھی جبکہ شوبز فنکار بھی شہروز سبزواری کی حمایت میں سامنے آ گئے تھے۔