پاکستان کے معروف اداکار عثمان مختار اداکارہ نیمل خاور کے حق میں بول پڑے ہیں۔

 حال ہی میں پاکستان کے معروف اداکار عثمان مختار نے اداکارہ نیمل خاور کی مبینہ کاسمیٹک سرجری پر کہا کہ یہ ان کا ذاتی فیصلہ تھا جس سے کسی دوسرے شخص کو کوئی نقصان نہیں پہنچا ہے۔

عثمان مختار نے کہا کہ ہم پورا پورا دن سوشل میڈیا پر بیٹھ کر ذہنی صحت کی بات کرتے ہیں کہ یہ کتنی ضروری ہے، پھر اس کے بعد ایک انسان جس نے خود سے متعلق فیصلہ کیا اس پر تنقید کرتے رہتے ہیں، جو انہوں نے کیا وہ ان کا انتخاب ہے جس سے کسی کو نقصان نہیں پہنچا۔

اداکار نے کہا کہ ہر کسی میں اتنی عقل ہوتی ہے کہ کسی نے کچھ کیا اور آپ کو پسند نہیں تو آپ وہ نہیں کریں گے لیکن ہم بیٹھ کر پورا دن ان کو ٹرول کررہے ہیں تو جو ذہنی صحت کا بھاشن ہم دیتے ہیں، اس کا کیا فائدہ ہے؟ اس کا احساس ہم سب کو ہونا چاہیے کہ ہمیں اس قسم کی چیزیں نہیں کرنا چاہئیں۔

واضح رہے کہ گزشتہ ماہ نیمل خاور خان کی کچھ تصاویر سوشل میڈیا پر وائرل ہوئی تھیں جس پر مداحوں نے الزام عائد کیا تھا کہ اداکارہ نے اپنی ناک کی سرجری کروائی ہے، کچھ لوگوں کا یہ بھی کہنا تھا کہ یہ سرجری نیمل نے حمزہ کی بہن اور اپنی نند فضیلہ عباسی سے کروائی ہے۔

بعدازاں ڈاکٹر فضیلہ عباسی نے اس افواہ کی تردید کرتے ہوئے کہا تھا کہ انہوں نے نیمل کی سرجری نہیں کی۔