پاکستان کے معروف ہدایتکار و اداکار یاسر نواز نے ترک سیریز ارطغرل غازی پر کڑی تنقید کی ہے۔

حال ہی میں پاکستان کے معروف ہدایتکار و اداکار یاسر نواز نے اہلیہ ندا یاسر کے ہمراہ ویب شو میں شرکت کی جہاں انہوں نے مختلف موضوعات پر گفتگو کی۔

  شو کے دوران میزبان کی جانب سے پاکستانی ڈراموں سے متعلق کیے گئے سوال پر یاسر نواز نے کہا کہ ایسے ڈرامے بنانا جس میں مزاح کا عنصر زیادہ ہو، یہ کافی مشکل ہے کیونکہ کامیڈی آسان نہیں اور اب پاکستانی ڈراموں میں سے کامیڈی بالکل ختم ہوچکی ہے۔

انہوں نے کہا کہ دنیا بھر میں ایک ہی طرز پر ڈرامے بنائے جاتے ہیں، بس یہ ڈرامہ ساز پر ہوتا ہے کہ وہ کس طرح ناظرین کے سامنے اپنے ڈرامے کو پیش کرے، یہیں سے اس کی تخلیقی صلاحیتوں کا علم ہوتا ہے۔

یاسر نواز نے کہا کہ ڈرامے ایسے بنائے جاتے ہیں جیسے ہماری خواتین دیکھنا پسند کرتی ہیں۔

انہوں نے ترک سیریز ارطغرل غازی کی مثال دی اور کہا کہ پاکستان میں مقبول ہونے والے ترک ڈرامے ارطغرل غازی میں بھی جنگوں سے زیادہ ساس، بہو اور رومانس کو دکھایا گیا ہے۔

شو کے دوران ندا یاسر نے شوہر ہی کی بات کو دہراتے ہوئے کہا کہ اگر ارطغرل غازی میں صرف جنگیں دکھائی جاتیں تو وہ اتنا مقبول نہیں ہوتا، اس میں رومانس، ساس اور بہو کو دکھانے کی وجہ سے وہ کامیاب ہوا۔

واضح رہے کہ ترک ڈرامہ ارطغرل غازی 2020 میں پاکستان ٹیلی وژن (پی ٹی وی) پر نشر کیا گیا تھا،  جس نے مقبولیت کے کئی ریکارڈز توڑ ڈالے۔