ماڈل و اداکارہ غنا علی کے مطابق بیک وقت ایک جیسے متعدد کردار ادا کرنے کی وجہ سے ان کی ذہنی صحت پر اثر پڑا جس وجہ سے انہیں ماضی میں ماہر نفسیات کے پاس بھی جانا پڑا۔

غنا علی نے 2015 میں اداکاری کا آغاز کیا اور انہوں نے ڈراموں سمیت تھیٹرز میں بھی کام کیا جب کہ وہ ماڈلنگ بھی کرتی رہی ہیں۔

اداکارہ شادی اور بچوں کی پیدائش کے بعد کچھ عرصے تک اسکرین سے دور تھیں لیکن اب وہ دوبارہ اسکرین پر آ چکی ہیں اور انہوں نے ایک بار پھر منفی کردار ادا کرنے سے چھوٹی اسکرین پر واپسی کی ہے۔

اداکاری اور دیگر مسائل پر حال ہی میں غنا علی نے دی نائٹ شومیں بات کرتے ہوئے بتایا کہ انہیں بچپن سے ہی اداکاری کا شوق تھا اور ابتدائی طور پر انہوں نے شہرت حاصل کرنے کے لیے تھیٹر میں کام کیا لیکن بعد میں انہیں احساس ہوا کہ انہیں شہرت نہیں اداکاری کرنی ہے۔

ان کے مطابق شروع میں انہیں شوبز کی بہت ساری چیزیں سمجھ نہیں آ رہی تھیں، اس لیے انہوں نے کیریئر شروع کرتے ہوئے وقفہ لے لیا اور بہت ساری چیزیں سیکھنے کے بعد انہوں نے دوبارہ اداکاری شروع کی اور انہوں نے خود میں واضح طور پر تبدیلی محسوس کی۔

انہوں نے انکشاف کیا کہ شروع میں انہیں مختصر کردار دیے گئے اور اس وقت انہیں یومیہ تین ہزار روپے معاوضہ دیا جاتا تھا۔

ایک سوال کے جواب میں غنا علی نے انکشاف کیا کہ اداکاری کے لیے لاہور سے کراچی منتقل ہونے کے بعد ایک مداح ان کے پیچھے پڑ گئے اور انہیں فون کرنے سمیت موبائل پیغامات بھجواتے رہتے تھے۔

ان کے مطابق وہ مذکورہ مداح کو بلاک کر کر کے تھک گئی تھیں لیکن وہ انہیں ہر بار نئے غیر ملکی نمبر سے میسیج کرتا تھا لیکن دلچسپ بات یہ ہے کہ وہ ان کے سامنے کبھی نہیں آیا۔

ایک اور سوال کے جواب میں غنا علی نے اعتراف کیا کہ کچھ عرصے بعد اسکرین پر دوبارہ واپسی اور منفی کردار ادا کرنے پر کردار کا ان پر اثر ہوجاتا ہے۔

غنا علی نے بتایا کہ اب بھی بعض مرتبہ وہ منفی کردار کے مناظر شوٹ کروانے کے بعد جب گھر پہنچتی ہیں تو ان کا رویہ تلخ ہوتا ہے اور شوہر انہیں بتاتے ہیں کہ ان کا لہجہ درست نہیں۔

ان کے مطابق ان پر ہمیشہ منفی کرداروں کا اثر ہوجاتا ہے، اس لیے انہوں نے فیصلہ کیا ہے کہ اب وہ بیک وقت ایک ہی کردار ادا کریں گی اور ایک ساتھ متعدد ڈراموں میں اداکاری نہیں کریں گی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں