بالی ووڈ فلم انڈسٹری کی مشہور و معروف اداکارہ رانی مکھرجی نے مداحوں سے بڑا وعدہ کرلیا ہے۔

اداکارہ رانی مکھرجی نے 54 ویں انٹرنیشنل فلم فیسٹول آف انڈیا سے خطاب کرتے ہوئے کہا کہ میں شائقین سے وعدہ کرتی ہوں کہ میں 80 سال کی عمر تک کام کروں گی، میں جلد گھر بیٹھنے والوں میں سے نہیں ہوں۔

انہوں نے کہا کہ میں اس بات پر یقین نہیں رکھتی کہ کسی اداکار کی عمر کو اسے جانچنے کے لیے استعمال کیا جائے، یہ صرف اس لیے ہے کہ ہمارے پاس ایک اوپن تھیٹر ہے جہاں آپ ہر وقت نوجوانوں کو اسکرین پر دیکھنا چاہتے ہیں۔

ان کا کہنا تھا کہ جب فلموں میں نوجوانوں کو دکھایا جاتا ہے تو پھر نوجوان بھی ایسی فلمیں دیکھنے کے لیے جاتے ہیں، تاہم یہ بھی اہم ہے کہ آپ اپنی فریبی دنیا میں نہ رہیں کیونکہ آپ ہمیشہ جوان نہیں رہیں گے۔

رانی مکھرجی نے کہا کہ آپ دل سے جوان ہو سکتے ہیں لیکن اپنی عمر کو قبول کرنا پڑتا ہے اور اسی کے مطابق مطابق کرداروں کو قبول کرنا پڑتا ہے، سامعین کے لیے بھی ضروری ہے کہ وہ اداکاروں کو اس طرح کے کردار میں قبول کریں۔

بالی ووڈ فلم انڈسٹری کی مشہور و معروف اداکارہ رانی مکھرجی کا مزید کہنا تھا کہ یہ ہمیشہ سے میرا شعوری فیصلہ رہا ہے کہ میں اپنے سامعین کو کچھ ایسا دے سکوں جو ان کے لیے قابلِ دید ہو۔