پاکستان میں، سوشل میڈیا انفلوئنسرز کو ہمیشہ مین اسٹریم میڈیا کی مشہور شخصیات کی تنقید کا سامنا کرنا پڑتا ہے جو یہ سمجھتے ہیں کہ سوشل میڈیا کی مشہور شخصیات نے بے ترتیب مواد دکھا کر بہت آسانی سے شہرت حاصل کی۔

ایک حالیہ انٹرویو میں فہد مصطفیٰ نے یوٹیوبرز کو تنقید کا نشانہ بنایا اور کہا کہ یوٹیوبرز سوشل میڈیا پر اپنے اہل خانہ کو بیچ کر مواد تیار کر رہے ہیں۔

ان کے بیان میں پاکستان کے معروف بلاگرز کو نشانہ بنایا گیا جس میں معاذ صفدر، ڈکی بھائی، اقراء کنول اور کنول آفتاب اور ذوالقرنین سکندر کا نام شامل ہے۔

تاہم، حال ہی میں کنول آفتاب اور جلال کریم کے پوڈ کاسٹ ’’نان اسٹاپ پوڈ کاسٹ‘‘ میں معاذ صفدر نے فہد مصطفیٰ کی تنقید کا جواب دیا اور کہا کہ میں نے ان کا بیان سنا لیکن میں نے اس پر کوئی ردعمل ظاہر نہیں کیا کیونکہ میں ایسا نہیں کرنا چاہتا تھا۔

انہوں نے کہا کہ میں یہ سوچتا ہوں کہ جس طرح وہ کام کر رہے ہیں میں بھی اسی طرح کام کر رہا ہوں، میری ان سے ایک بار کراچی میں ملاقات ہوچکی ہے، وہ ایک قابل احترام شخصیت ہیں۔

معاذ صفدر نے اپنی بات کی مزید وضاحت کرتے ہوئے کہا کہ ہر ایک کو اپنا گھر چلانے کے لئے کسی مواد کی ضرورت ہوگی اور اگر وہ فلم میں کسی لڑکی کے ساتھ کام کر رہے ہیں تو اس لڑکی کا بھی ایک خاندان ہے۔

اس موقع پر یوٹیوبر کنول آفتاب نے بھی اپنا نظریہ پیش کیا اور کہا کہ اگر آپ اور میں ایک ساتھ ڈرامہ کر رہے ہیں اور ہم اپنے کردار ادا کر رہے ہیں تو ہم کیمرے پر آ کر اپنے کردار بیچ رہے ہیںتو کیا فرق ہے ٹی وی پر لوگ بھی کچھ بیچ رہے ہیں۔