بھارتی اداکار اور مزاحیہ کردار ادا کرنے والے سنیل گروور نے معروف کامیڈین کپل شرما کے ساتھ ہونے والے جھگڑے کے متعلق اپنے خیالات کا اظہار کرتے ہوئے حقیقت سے پردہ اٹھا دیا ہے۔

حال ہی میں میڈیا سے گفتگو کرتے ہوئے اداکار نے ان کے اور کپل کے درمیان ہونے والی لڑائی کا مذاق اڑایا جس نے چھ سال قبل تفریحی صنعت میں طوفان برپا کر دیا تھا۔

سنیل نے طنزیہ انداز میں میڈیا کو بتایا کہ اس وقت اسٹریمنگ پلیٹ فارمز ملک میں اپنی جگہ بنا رہے تھے لہذا انہوں نے اور کپل نے سوچا کہ وہ ٹیلی ویژن کے مواد کو او ٹی ٹی پلیٹ فارم یا اس سے بہتر کرنے کے لیے کیا کر سکتے ہیں۔

انہوں نے مذاق میں کہا کہ “اس وقت نیٹ فلکس انڈیا میں نیا نیا آیا تھا تو ہم کو لگا کے ٹیلی ویژن کے سامعین کو اپنے ساتھ بنائے رکھنے کے لیے ہمیں کچھ کرنا پڑے گا اور اس طرح ہمیں پبلسٹی اسٹنٹ کے طور پر لڑائی کا خیال آیا۔”

خیال رہے کہ معروف کامیڈین کپل شرما اپنے انتہائی متوقع شو کے ساتھ ایک بار پھر ناظرین کو حیران کرنے کے لیے تیار ہیں، جو اب ایک او ٹی ٹی پلیٹ فارم پر نشر ہونے جارہا ہے۔

کپل شرما نے شو کی واپسی کے لیے اپنے جوش کا اظہار کرتے ہوئے کہا، “ہم واپس آ گئے ہیں! جبکہ شریک اداکار سنیل گروور نے اپنے جذبات کا اظہار کرتے ہوئے شو کو “گھر واپسی” کے طور پر بیان کیا ۔

دوسری جانب ساتھی کاسٹ ممبران راجیو ٹھاکر، کیکو شاردا، کرشنا ابھیشیک، اور ارچنا پورن سنگھ نے بھی شو کی واپسی کے لیے اپنے جوش و خروش کا اظہار کرتے ہوئے، 30 مارچ سے شروع ہونے والے ہر ہفتہ کو “حیرت انگیز اقساط” اور “ہنسی کے بڑے دھماکے” کا وعدہ کیا۔

“دی گریٹ انڈین کپل شو” کا پہلا ایپی سوڈ 30 مارچ کو اسٹریمنگ کے لیے دستیاب ہوگا۔