بالی ووڈ فلم انڈسٹری کی مشہور و معروف اداکارہ رانی مکھرجی نے کہا ہے کہ اُن کی والدہ بچپن میں سالگرہ منانے نہیں دیتی تھیں۔

حال ہی میں اداکارہ رانی مکھرجی نے بھارتی میڈیا سے گفتگو کرتے ہوئے کہا کہ مجھے بچپن سے ہی سالگرہ منانا بہت پسند ہے لیکن ہمیشہ میری سالگرہ کے دوران اسکول کے فائنل امتحانات آجاتے تھے جس کی وجہ سے والدہ سالگرہ نہیں منانے دیتی تھیں۔

انہوں نے کہا کہ میں اپنی سالگرہ کے دن دُکھی ہوتی تھی کیونکہ میں اپنے دوستوں کے ساتھ سالگرہ کا جشن منانے کے بجائے، کتابیں لیکر امتحانات کی تیاری کررہی ہوتی تھی۔

ان کا کہنا تھا کہ میری والدہ میری اُداسی دور کرنے کے لیے مجھے چاکلیٹس دیتی تھیں تاکہ میں اپنی کلاس کے تمام دوستوں کو وہ چاکلیٹ دے کر اپنی سالگرہ کی تھوڑی سی خوشی منا سکوں۔

رانی مکھرجی نے بتایا کہ اب وہ اپنی بیٹی ادیرا کے ذریعے اپنی تمام ادھوری خواہشات کو پوری کرتی ہیں۔

اداکارہ نے کہا کہ اب میں اپنی بیٹی ادیرا کی سالگرہ بہت پیار سے مناتی ہوں، مجھے اپنی سالگرہ سے جو توقعات تھیں، انہیں میں اپنی بیٹی کی سالگرہ کے ذریعے پورا کرنے کی کوشش کرتی ہوں۔

ان کا مزید کہنا تھا کہ میں اپنی سالگرہ کو سادگی سے مناکر زیادہ خوش ہوتی ہوں، میں اپنی بیٹی، شوہر، ماں اور اپنے چند قریبی دوستوں کے ساتھ سالگرہ منانا پسند کرتی ہوں، جب ہم ساتھ ہوتے ہیں تو ہم ایک ساتھ ہنستے ہیں، ہم اچھا کھانا کھاتے ہیں۔